Poi Japan ki heh ka tnad Sports ka Meghalaya ban sakhi ïa ka rukom pynïaid ïa ka Asian Games 2026

SHILLONG, Nailur 25: Ka kynhun kaba phra ngut ki ophisar, hapoh ka jingïalam u Bah Wailadmiki Shylla, Myntri ka tnat Sports, Meghalaya, ka la leit sha Aichi-Nagoya, Japan, ban jurip bad peit ïa ka rukom pynlong bad pynïaid ïa ka Asian Games 2026, kaba long naduh ka 19 tarik Nailur haduh ka 04 tarik Risaw 2026.
Ha ka 24 tarik Nailur, ka kynhun ka la leit sha ka Athletics Venue ha Nagoya, Japan, ryngkat ka jingdonlang u Myntri Sports ka Jylla bah Wailad Shylla, nangta ka Dr PT Usha, President ka Indian Olympic Association, bah John F Kharshiing, Working President ka MSOA, bad ka Neetal Narang, Safeguarding Officer jong ka Indian Olympic Association.
Ha kane ka jingleit jurip, ka kynhun ka la leit peit ïa bun tylli ki jaka pynlong jingïalehkai, kynthup ïa ka Boxing, Basketball, Table Tennis, Shooting, Archery, Athletics bad Swimming. Ki dkhot jong ka kynhun ki la ïakren bad ki Technical Officials bad ki nongpynïaid ban tip kham bñiah shaphang ka rukom pynkhreh bad pynlong ïa ka jingïalehkai kaba heh kum ka Asian Games.
Ka Japan ka la ïoh teng ban pynlong ïa ka Asian Games ha Tokyo ha u snem 1958 bad ha Hiroshima ha u snem 1994 bad mynta ka dei ka sien kaba lai.
Ha kane ka sienjam ki don haduh 469 tylli ki jingïakhun ïaknieh takma ha ki 43 tylli ki jait jingïalehkai, kaba kham bun ïa ki 40 jait ki jingïalehkai ha ka Asian Games kaba la dep ha Hangzhou.
La khmih lynti ba kin don kumba 17,000 ngut ki nongïalehkai bad ki ophisar na ki 45 tylli ki ri bad ki thaiñ kiba ïashim bynta. Na kine, kumba 11,000 ngut ki dei ki nongïalehkai bad 6,000 ngut ki dei ki ophisar bad nongtrei.
Ki jingïalehkai kin long ha ki bynta bapher bapher jong ka Aichi Prefecture bad ha kiwei pat ki bynta jong Japan. Ka Tokyo kan pynlong ïa ki jingïalehkai Swimming, katba ka Osaka kan long kawei na ki nongbah ban pynlong ïa ki jingïalehkai phutbol.
Ka Asian Games 2026 kan long ruh ka lynti ban pyntikna sha ka Los Angeles Olympics 2028 ha ki jait jingïalehkai kynthup ïa ka Archery, Hockey, Sailing, Squash, Surfing, Tennis bad Triathlon.
Ka kynhun na Meghalaya ka la leit sha Japan khnang ban ïoh jingtip bad jingïohsngewthuh shaphang ka rukom pynkhreh, ka jingpynïaid bad ka jingpynlong ïa ki jingïalehkai kiba heh. Hadien ka jingleit jurip, ka kynhun kan pynkhreh ïa ki jingpule, ki jingtip ba la ïoh bad ki jingai jingmut sha ka Department of Sports and Youth Affairs, Government of Meghalaya.
Kine ki jingtip kin long ka jingïarap ban pynbha ïa ki jingpynkhreh jong ka Jylla na ka bynta ka 39th National Games Meghalaya 2027, kaban long ha u snem ban wan.
Nalor u Myntri ka tnad Sports Meghalaya, kiwei pat ki dkhot jong ka kynhun ki kynthup ïa bah John F Kharshiing, Working President ka MSOA; bah Finely L Pariat, General Secretary-MSOA; bah A L Nongbri, MCS, Director; Deputy Director, Department of Sports and Youth Affairs; Senior Project Engineer, State Sports Council of Meghalaya; bad u Sports Consultant, Department of Sports and Youth Affairs.