Shillong, Risaw 16: Ka Nongkseh ka la pynliem noh ïa ka Mawlai da tang 1-0 kol ha ka jingïakhun semifinal ba nyngkong jong ka SSA Super Cup 2026 hynne ka janmiet sngi Thohdieng ha madan First Ground-SSA Stadium.
U Banraplang Pyngrope u la thep ïa kane ka namtam ha ka minit kaba 47 na ka bynta ka Nongkseh, bad ka kynhun ka la pyndep ïa ka jingïakhun da kaba khanglad ïa kiei kiei baroh ba ka Mawlai ka pyrshang ban wanphai, ha kaba la jin baroh 10 ngut ki la shan skhem sha bak.
Dei naduh katei ka por ba ka Mawlai ka la pynkhlaiñ shakhmat hynrei ki jingpyrshang jong ki kim shym la poi sha ka thong bad don ruh kiba shah kyntait ha ki nongïalehkai ka Nongkseh.
Kumta ka Nongkseh kan ïa kynduh pyrshah ïa ka kynhun ba jop ha ka semifinal kaba ar, kaban long hapdeng ka Shillong Lajong pyrshah ïa ka Meghalaya Police mynta ka sngi Saitjaiñ ha ka por 5 baje janmiet. Ka Mawlai, kaba dei ka lahduh jong ka Shillong Premier League 2026 bad ka Lajong kaba la wan baar ki la ïoh ban rung beit beit sha ka semifinal, katba ka Nongkseh bad ka MLP ki la rung lyngba ka playoffs.
Kane ka dei ka nam rem kaba nyngkong eh jong ka Mawlai ha ka samoi ïalehkai phutbol jong ka SSA mynta u snem 2026, hadien ba ka la ïaid khlem shah rem ha ka lynti jong ka ban rah ïa ka nam lahduh ha ka SPL. Ka la lah ban pynliem ïa ka Nongkseh da 1-0 kol ha ka por ba ki ïa kynduh ha ka SPL ha ka 02 tarik Nailur.
Related Posts
Ka kabu ksiar ba nyngkong ha kane ka jingïakhun ka la leit sha ka Mawlai ha ka minit kaba saw hynrei u nongapkol ka Nongkseh u Daraphun Talang u la lah ban khanglad ïa ka jingpyrshang na ka korner. Nangta sha kawei pat ka liang jong ka madan ka jingpyrshang thep kol ‘bicycle kick’ da u Chesterpaul Lyngdoh la ïoh kem noh da u nongap kol ka Mawlai u Lambhamiki Lamare, uba la lum ïa ka bol shuwa ba kan ïaid lait ïa u laiñ.
Ka kylla step ka la kut khlem kol hynrei ki nongkyrshan kim shym la hap ban ap slem ban sakhi ïa ka kol kaba pynïakhlad ïa kine ki arliang mamla ha ka kylla miet. Ka bol pashat na ka free-kick ba la shut da u Hardy Cliff Nongbri ka la rung hapoh ka box shuwa ba u Banraplang un pynïasoh tiak da ka khlieh ban pynkhihjar.
Hadien kane ka Mawlai ka la nang pynjur ban pynkhlaiñ shakhmat tang ban ïoh pynïakhaid, bad ha kiba bun ki khep ka Nongkseh ka la hap ban kyrshan skhem da baroh 10 ngut ki nongïalehkai ban khanglad ïa ka Mawlai.
Ka rukom pashat bad sam bol jong ka Mawlai ka la long kaba janai naduh kane ka por hynrei ka la duna ha ka bynta ba kongsan tam, kata ban pyndep ïa ka kamram ban thep kol, kiba kynthup ïa ka kabu ksiar jong u Jestibor Mawlong ha ka minit kaba 78 bad u Basuklang Bina ha ki minit pynjlan shuwa ban kut ka por.
Watla ka la shah ñion ha ka bynta shuwa ban kut hynrei ka la long ka jingïalehkai kaba tyngeh jong ka Nongkseh bad kaba kham itynnad shibun ban ïa ka jingïalehkai playoff pyrshah ïa ka Sawmer, ba ka la jop da 4-2 kol.
Na ka bynta ka kol pynjop bad ka jingshan skhem ha bak, u Banraplang u la shah jied kum u T7 Player of the Match bad u la ïoh khur ïa ka khusnam na u Vice-President barim ka SSA bad u Chief Secretary ka Meghalaya ba la shongthait u bah Donald P Wahlang.