Ngi la ïoh NOC na Dorbar Shnong bad ngi khlem leh kano kano kaba rieh ïa ka Ropeway Project: Pakynteiñ

Shillong, Risaw 17: Ka Director jong ka tnad Jngohkai pyrthei ka Kong B. L. Pakyntein, MCS, ka la kren halor ki jingeh ba la pynpaw da ka Joint Action Committee (JAC) halor ka jingthmu ban shna ïa ka lynti nar ne ka Ropeway ha Riat Laban, da kaba pynpaw ba ka tnad ka la ïakynduh ïa ka JAC ban pynshai ïa ki mat kiba ïadei bad kane ka projek ha shwa ka jingïakhih ba ka thmu ban pynlong ha ka sngi Saitjaiñ.
Ka Kong Pakyntein ka la ïathuh ba ïa kane ka jingïalang bad ka JAC la pynlong ha ka sngi Palei hapoh ka jingpynïaid jong ka Commissioner bad Secretary ka Kong R. M. Kurbah, IAS, bad la wan ban ïashim bynta da ki heh na ki tnad bapher bapher. Ka jingïalang ka thmu ban weng ïa ki jingeh ba la pynpaw da ka JAC bad ban ai jingshai halor ka jingpyntreikam ïa ka projek.
Ha kane ka jingïakynduh, ka Commissioner bad Secretary ryngkat bad ki riew shemphang ha ka liang ka mariang jong kane ka projek, ki la ai ïa ka jingpynshai kaba la batai ïa ki lad ki lynti kiba la shim bad ki jingbit kiba la ïoh na ki bor ba dei peit.
Katkum ka jingong ka Kong Pakyntein, ka tnad ka la ïoh ïa ki jingbit kiba donkam, kynthup ïa ka No Objection Certificate (NOC) na ka Dorbar Shnong, bad ka la ïasoi ruh ïa ka jingïateh shim wai shwa ban ïaid shakhmat ïa katei ka projek.
Halor ki jingsngewkhia ha kaba ïadei bad ka jingpynlong ïa ka jingbishar paidbah, ka la ong ba ka tnad ka la thoh sha baroh hynñiew ngut ki Rangbah Shnong, da kaba kyrpad ïa ki ban pynbeit bad ïakren ïa ki nongshong shnong ban ïashim bynta ha ka jingbishar, da kaba ïaid ryngkat bad ka rukom ba la buh ban pynïasoh ïa ki jaidbynriew lyngba ki bor synshar shnong tynrai jong ki.
Shuh shuh ka la pynshai ba ïa kane ka kam tender la sdang hadien ba la ïoh ïa ka NOC na ka Dorbar Shnong. Ïa u kontraktor ba la shah jied u la donkam ban pynbiang ïa ki laisen kiba donkam, kynthup ïa ka laisen khaïi na ka Khasi Hills Autonomous District Council (KHADC).
Ka Kong Pakyntein ka la kam ba ka laisen khaïi ka dang sahteng hadien ki jingpyrshah ba la pynpaw da ka JAC, katba ka la pynskhem ba ka tnad ka la shim ïa ki jingïamir jingmut kiba donkam bad ïoh ïa ki jingbit kiba donkam.
Haba pynrem ïa ki jingkynnoh ba la bud ïa kane ka projek khlem ka jingpyntip paidbah kaba biang, ka la ong ba ka tnad ka la ïasam ïa ki jingtip shaphang kane ka jingthmu bad ka la pynskhem ba ka long kaba bakla ban ai jingmut ba la leh haba rieh ïa kane ka projek. Ka la batai ïa ka jingthmu ban ïaid lynti kum ka projek kaba pawnam na ka bynta ka Jylla.
Ha ka liang jong ka aiñ, ka Kong Pakyntein ka la ong ba ïa ka jingmudui jong ka Public Interest Litigation (PIL) kaba ïadei bad katei ka projek la pynkut noh da ka Meghalaya High Court. Ka la kdew ruh ïa ka jingbit kaba shai haba ïadei bad ka Environmental Clearance ba la ïoh na ka bynta kane ka projek.
Ka la pynpaw biang ba ka tnad jngohkai pyrthei ka dang plie ïa ka lad bad ka lynti jong ka jingïakren bad ki kynhun kiba ïadei ban weng ïa ki jingeh jong ki bad ban pynshai ïa kino kino ki mat kiba dang sahteng kiba ïadei bad ka projek ropeway ba la tyrwa.