Jowai, Nailur 24: Ka Iawthymblien, ka Kdiap Rising Sun bad ka Madur ki la jop ïa la ki jong ki jingïalehkai jong ka lympung phutbol (L) Joybell Suiam Memorial Football League 2026 ha ka kyrdan Second Division bala pynïaid da ka Thadlaskieñ Sport Association, kiba la long hynne ka sngi Palei, ka 24 tarik u Nailur, 2026 ha madan Wahiajer Multi Sports Complex Stadium.
Ka Iawthymblien kala jop da 2-1 pyrshah ïaka Nartiang Mainroad ha ka jingïalehkai ba nyngkong.
Ka Iawthymblien ka la pynkhihjar nyngkong lyngba u Dawio Suna (18’) shuwa ba ka Nartiang Mainroad kan pynïakhaid shipor lyngba u Syngkli challam (38’). Hynrei u Prince Suna (54’) u la thep ïa ka namtam ha ka kylla miet ban pynthikna jingjop na ka bynta ka Iawthymblien.
Nangta ka jingïakhun kaba ar la sakhi ïa ka Kdiap Rising Sun kaba la pynliem da 6-2 kol ïa ka Moodymmai.
U Wanbha Sari (2, 4, 8, 27 & 46’) u la long u rangïalehkai ba kongsan tam jong ka Kdiap Rising Sun, ha kaba u la pynkhihjar san sien marwei, katba u Riskiel Dkhar (14’) u la bynrap ïa kawei pat. Na ka bynta ka Moodymmai ki ar kol la thep da u Sumi Lamare (66’) bad u Emi Ryngkhlem (69’).
Haba phai pat sha ka jingïakhun ba khatduh, ka Madur kala jop da 3-1 pyrshah ïaka Maitchaphrang.
Ka Madur ka la lamkhmat da 2-1 ha ka kylla step lyngba ki kol na u Nanbait Phawa (20’) bad u Donbok Dkhar (25’) shuwa ba ka Maitchaphrang kan pynphai kawei na u Marbait Nongpluh (39’). U Kermi Ksoo u la pynskhem ïa ka jingjop na ka bynta ka Madur da ka kol kaba lai ha ka minit kaba 50.
La pyntip ba ki jingïakhun ha kane ka sngi Thohdieng (25/09/2026) ki long: Por 10 baje mynstep-ka Nongdhar Nongthymme pyrshah ïa ka Tympang Wahiajer; nangta Por 12 baje shiteng sngi ka Shillong Police pyrshah ïa ka Rc Dreaming Mupliang; bad khatduh ha ka Por 2 baje nohphai sngi ka Mukhla Wahchnong pyrshah ïa ka Maya Club Wahiajer.
