Shillong, Naiwieng 29: Ka kynhun lehkai jong ka Meghalaya ka la mad ïa ka namrem da tang 4 wicket ha ka Maharashtra ha ka lympung lehkai jong ka Vijay Hazare Trophy (men’s one day tournament) kaba long ha Jaipur hynne ka sngi.
Watla kata ruh, na ka liang jong ka Meghalaya ka lah ban ïalehkai bha bad buh ïa ka thong da 227 shuwa ban shah pynhap baroh ki wicket (all out) na ki 47.5 over. Haba beh ïa kane ka ron, ka Maharashtra ka la ïakynduh jingeh hadien ba shah pynhap haduh 4 wicket bad 60 ron shuwa ba kan pyndep ban kynjoh sha ka thong ba la buh da kaba hap satang ar ngut bad pynsah sa 10 over.
Ka Maharashtra ka la jop ïa ka toss bad phah ïa ka Meghalaya ban tied nyngkong. Dei lyngba u Raj Biswa bad u Nakul Verma ba ka kynhun ka la kiew bha ha ka jingïoh kamai ron. Baroh arngut ki la kynjoh sha ka 50 ron shaneng, u Biswa u la kamai 56 katba u Verma 55 ron.
U Kishan Lyngdoh, u ba la mih hadien u la lah ban kamai 40 ron na ki 41 bol, katba u Swarajeet Das 24 ron bad u Tanmay Mishra 23 ron.
Haba phai pat sha ka bowling, ka Meghalaya ka la ïoh ban pynhap ïa saw ngut ki rangtied ba hakhmat jong ka Maharashtra tang hadien ba pyndep ïa ka 13 overs bad ailad tang 60 ron ban ïoh kamai.
Hynrei ka jinglah ban lehkai bha jong arngut, kata u Siddharth Mhatre, u ba mih madan ha ka sien ba nyngkong ha kane ka BCCI one day match, lem bad u NS Naik, ka la ïarap ïa ka Maharashtra ban kynjoh sha katei ka thong ba la buh.
Ka Meghalaya kan ïakhun pyrshah ïa ka Services lashai ka sngi Thohdieng.
