Shillong, Naiwieng 29: Ka kynhun ïalehkai jong ka Laitlyngkot SC ka la ïoh ban khur ïa ka namjop ha ka jingïakhun ba la long hynne ka Sngi Balang jong ka lympung SSA 2nd DIVISION Football League 2023, ha SSA Ground, katba ka jingïakhun hapdeng ka Mawtawar SC pyrshah ïa ka Jongksha SC ka la kut ha ka jingïakhaid.
Haba phai sha ka jingïakhun kaba nyngkong ba la sdang ha ka por 11:30 baje mynstep, ka Sohiong SC ka la shah pynliem da 0-2 kol ha ka Laitlyngkot SC. Baroh ar tylli ki kol na ka Laitlyngkot SC la thep da u Libesstar Nongkynrih ha ka 10 & 61 minit.
Katba haba phai pat sha ka jingïakhun kaba ar, ha ka por 2:30 baje nohphaisngi, ka Mawtawar SC bad ka Jongksha SC ki la ïakhaid da mar 2-2 kol. Ha ka jingïakhun, dei ka Jongksha SC kaba la ïoh ban lamkhmat haduh 2 kol lyngba u Jopborlang khongsngi ha ka 56 minit bud sa na u Babiang Umsong ha ka 65 minit, hynrei ka Mawtawar SC ka la ïoh ban pynïakhaid lyngba u Fedrick Lyngdoh ha ka minit ba 69 nangta na u Ronaldo Rangslangha ka 80 minit.
