Wan plie u Ma Lakmen Rymbui ïaka ‘36th Annual College Week’ ha Ri-Bhoi College
Tang ki samla kiba trei shitom kiba im bad kiew shaphrang haka jingim
Nongpoh, Naiwieng 08: Hapdeng ka jingiphuh iphieng, ki samla pule jong ka Ri-Bhoi College kawei naki shlem ai jinghikai kaba la rim tam ha Ri-Bhoi mynta ka sngi hapdeng ka jingiphuh iphieng kala sdang ïaka taiew lehkmen ki samla pule bala tip kum ka 36th Annual College Week bala wan ban plie pyrda da u Ma Lakmen Rymbui myntri ka tnad pule puthi bad kam pohiing ka jylla kum u kongsan.
Ha katei ka prokram lehkmen ki samla pule ka Ri-Bhoi College la wan ruh ban don ryngkat lang da ka kong WK Blah Secretary ka Governing Body jong ka Ri-Bhoi College kum ka symbud kongsan, u Giri Prasad Superintendent of Police ka Ri-Bhoi, Bah R Kharbihkhiew ADC ka Ri-Bhoi, u Bah SSR Bamon Principal ka Ri-Bhoi College, u Samla Jayson Lennox Nongrum President ka Ri-Bhoi College Student Union, ki nonghikai lem bad ki samla pule jong katei ka college.
Ha katei ka sngi naka liang ka College kala ioh ruh ban pynlait paidbah ïaka kot thup sah kynmaw (Souvenir) haka sien ba nyngkong eh bala pynlait paidbah da u Ma Lakmen Rymbui bad kiwei kiwei ki riew rangbah lem bad ki nonghikai.
Naka liang ki samla pule kila shimbynta ruh haka rwai ka siaw, ka shad ka kmen bad kumjuh ruh ki jinglehkai bad ki jingïakop bapher bapher ha katei ka sngi, kaba dei ruh shibynta jong ka jingim ki samla ban heh ban san ban don ka por lehkmen nalor ka jingpule kaba ki pynlut por man ka sngi.
Haba kren ha katei ka sngi naka liang u Ma Lakmen Rymbui u la pynpaw ba ka por ban lehkmen ka long kaba donkam haki samla, hynrei ka dei ban don pat ka por, namar dei tang ki samla kiba trei shitom, kiba durut, bad kiba minot kiba poi shaka thong bad ka ki kliar lum jong ka nam haka jingim jong ki khlem da ai daw.
U la ong ruh ba kum ki samla pule ki dei ban long kiba iaishah ïaka jingeh, bad ki jingtynjuh haka jingim, namar shibun ki jingpynshoi bad ki jingtynjuh ki wan, hynrei kita kim dei ban long ki daw ka jingshah rem, namar ka pyrthei kaba ngi im ka dap tang ki jingïaleh bad tang kiba ïakhun kiba ioh ïaka jingjop da kaba ai mynsiem ruh ïaki samla pule ba kim dei ban pynlong daw ïaka jingduk jingkyrduh hynrei ban trei shitom kumba ka sorkar ka ïarap lyngba ka scholarship kaba ki khynnah kim dei ban pynlut kai hynrei ban ioh pat ban kyrshan ïaka bai pule jong ki, u la bynrap.