Pynkup bor ka ophis u DC ka EJHD ha ka EJAC&TS ban pynbit pynbiang bad ban peit ïa ki kam jngohkai pyrthei ha EJHD

Khliehriat Naiwieng 8: Na ka bynta ban kyntiew shuh shuh ïa ka kam jngohkai pyrthei hapoh ka district, ka ophis jong u Deputy Commissioner ka East Jaiñtia Hills District, ka la pynkup bor ha ka East Jaiñtia Adventure,cultural and Tourism Society (EJAC&TS) ban pynbit, pynbiang bad ban peit ïa ki kam kiba ïadei bad ki nongwan jngohkai pyrthei kiba wan hapoh East Jaiñtia Hills District.
Katei ka Society kan shim ka jingkitkhlieh ïa ki nongjngohkai pyrthei bad kumjuh ruh ïa kito kiba wan ban wad bniah lane ban leh research bad kito kiba wan ban leh ïa ki docmentary film, ha kajuh ka por ka Siciety kan pynbit pynbiang ruh ïa kito kiba wan ban leh treking, kiba kiew ïa ki lum lane ki rock climbing, ki scuba diving, kayaking, kiba leh paragliding, rafting, parachuting, hand gliding, gliding, paramotoring, hiking, kiba rung krem (caving), kiba ñiah cycle, kin peit ruh ïa ki cultural prokram bad kiwei kiwei kiba ïadei bad ki kam jngohkai pyrthei.
Ha kajuh ka por ka East Jaiñtia Adventure, Cultural and Tourism Society kan shim ïa ki jingkitkhlieh ban ai ïa ki lad jingïada bad jingshngain ki nongwan jngohkai pyrthei kiba wan sha East Jaiñtia Hills District, kane ka Society kan ai ruh ïa ki jingtip kiba paka ha kaba ïadei bad ki jaka jngohkai pyrthei kiba don hapoh ka district bad kumjuh ruh ki khana pateng ha kaba ïadei bad kino kino ki cultural prokram, kan pynwandur itynnad ïa ka jinglong jingman jong ka thaiñ bad kan wanrah ïa ka jingsngew shngaiñ mynsiem ha kiba wan ban peitkai ïa ki jaka kiba don hapoh ka district, kan pynbit pynbiang ruh ïa baroh ki jingdonkam jong kiba wan bad kane ka Society kan wanrah ruh ïa kata ka mynsiem bad ieid bad ban burom ïa la ka ri.
Katei ka Society kan ai jingtip ruh ha kaba ïadei bad ka leit ka wan, ka jingjngai jong ki jaka jngohkai pyrthei kiba ha ki kilo mitar, kan pynbit pynbiang kyrpang ruh na ka bynta kito kiba wan bad ki khynnah, ki khyllung, ïa kito kiba don jingduna ha ki dkhot met bad ïa ki tymmen ki san, ha kajuh ka por, kan shim ruh ïa ka jingïatreilang bad ki Dorbar Shnong bapher bapher.
Na ka liang ki nongïalam jong ka EJAC&TS ba kynthup u Adviser, u bah Chibor Wahlang, u President, u bah Jespar Bareh, u Secretary, u bah Vimol Lyngdoh, Assistant Secretary, u bah Sambor Wahlang, ki pynshai ba ka jingtreikam kane ka Society ka long ruh ban wanrah ïa ka jingiohnong ïa ka East Jaiñtia Hills District bad ïa ka jylla Meghalaya, kumba long lem kiwei kiwei ki jylla kiba ïoh ban lum khajna na ka kam jngohkai pyrthei bad ha kajuh ka por kane ka wanrah ruh ïa ka lad ïohkam ïohjam jong ki briew jong ka thaiñ bad la khmih lynti ba kane ka Society kan wanrah ïa ka jingkiew irat kaba pura bha ha ka kam jngohkai pyrthei ym tang hapoh ka district, hynrei ha ka jylla hi baroh kawei, ka ban wanrah jingmyntoi ruh ïa ki paidbah ka thaiñ.
Na ka liang ka EJAC&TS, ka buh ka jingkyrpad ïa baroh kito kiba wan ban jngohkai ïa ki jaka ha East Jaiñtia Hills District ba kin sngewbha ban da pyntip shwa sha ki nongïalam bad ki dkhot jong ka Society, khnang ba ka Society kan tip bad kan shim ïa ka jingkitkhlieh ha kaba ïadei bad ki jingpynbit pynbiang ïa ki bad la ong ruh ba kino kino kiba wan khlem ka jingpyntip, ka Society ruh kan nym shim ïa ka jingkitkhlieh lada jia kumno kumno ïa ki.