Wan phai ïing 2 ngut ki pulit ryngkat ka takma ksiar naka 73rd AIPWC 2024

Nongpoh, Nailur 15: Ki pulit jong ka Ri-Bhoi kila pynpaw ka jingsngew sarong hadien ba 2 ngut naki dkhot jong ka iing kiba la leit ban mihkhmat sha ka lympung ïakhun kti jong ki pulit kaba la tip kum ka 73rd All India Police Wrestling Cluster 2024 kaba la long ha Lucknow kila wanphai ïing ryngkat 2 tylli ki takma ksiar.
Kitei ki ar ngut ki pulit kiba la khur takma ksiar na katei ka lympung ki kynthup ïa u Alan S Marbaniang na Ri-Bhoi DEF bad ka Wandalin Syiemiong na ka 6th MLP BN bad naka liang ka tnad pulit jong ka Ri-Bhoi kala leit ban pdiang burom ïa kitei ki 2 ngut naduh kad liengsuiñ ha Guwahati, bad lyngba ka jingjop jong kitei ki 2 ngut na katei ka lympung kala rah ruh ka nam bad ka burom ïaka tnad pulit haka jylla hi baroh kawei.
Shuh shuh naka liang ka tnad pulit ki la ai khublei kyrpang ïa kitei ki 2 ngut ki Pulit halor ka jingjop bad ki ai ruh ka jingkyrkhu kyrdoh ba kin dang kiew shaphrang ha ka jingim bad ruh ba kin dang lah ba pyndonkam hok ïa ka sap kaba ki don haka jingïakhun kti.