Khliehriat, Nailur 15: Ka lympung ïalehkai phutbol jong ka kyrdan 2nd Division bala pynïaid da ka East Jaiñtia Hills District Football Association kaba la long ha kane ka sngi Saitjaiñ 14 tarik u Nailur ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong ka kynhun ïalehkai jong ka Musniang SC kala pynliem da 3-0 kol ïa ka Iapmala UTD SC. ïa ki kol na ka Musniang la thep da u Mardi Rymbai haka minit ba 14, u One enjoy Dkhar haka minit ba 44 bad u Yookilang Siangshai haka minit ba 69.
Ha ka jingïakhun kaba bud ka R.Madanpynriang SC kala pynliem da 1-0 kol ïa ka Ladrymbai Dongwah SC, ïa kane ka namtam na ka R. Madanpynriang la thep da u Encourage Dkhar haka minit ba 74 shuwa ban kut.
Katba ha ka jingïakhun hapdeng ka Lumputhoi SC pyrshah ïa ka Umlyngsha Youth SSC kala poi sha ka jingïakhaid da mar 2-2 kol. Ki kol na bynta ka Lumputhoi SC la thep da u Midrik Lyngdoh haka minit ba 17 bad u Klan Lyngdoh ha ka minit ba 72. Ïa ki kol na ka Umlyngsha Youth SSC la thep da u Eleven Biam haka minit ba 6 & 43.
Ki kynhun kiba la ïoh ban rung sha ka Quarter Final ki long ka R.Madanpynriang SC bad ka Ladrymbai Dongwah SC na ka Pool A, ka Musniang SC na ka Pool B, ka Umlyngsha Youth SSC bad Lumputhoi SC na ka Pool C, katba ka Lakadong Umlatdoh na ka Pool D.
