Shillong, Nailur 15: Ki ar tylli ki jingïakhun ka lympung Third Division 2024 jong ka Shillong Sports Association ba la long ha ka Sngi saitjaiñ (taïew ba ladep) ha SSA Ground, Polo, la sakhi ïa ka Mawpat SC bad ka Mawkriah West SC kiba la seisoh ban khur ïa ki lai point hadien ka namjop.
Ha ka jingïakhun kaba nyngkong ka Mawpat ka la wanphai ban pynkhih ïa ki ar kol ha ki minit shuwa ban kut ka por kaba la pynsngewsih ïa ka Umlyngka SC, kata ban jop ïa ka jingïalehkai da 2-1 kol.
Ha ka 38 minit u Chaster Makhroh u la pynkhih ïa ka kol kaba nyngkong ban buh hakhmat ïa ka Umlyngka ha kane ka jingïalehkai. Naduh ka kylla step ka Umlyngka ka la lamkhmat ïa ka jingïakhun, dei tad ynda la jam sha ka 81 minit ba ka Mawpat SC ka la jubab da kaba pynïakhaid lyngba ka kol na u Batiplang Bamon. Kane ka dei ruh ka kol kaba 150 jong kane ka lympung mynta ka samoi.
Kane ka kol ka la long kumba ai mynsiem ïa ka Mawpat kaba la durut tyngeh bad ha ka 85 minit u Dikorta Nongrum u la pynkhih ïa ka kol ban pynthikna namjop ïa ka kynhun. Kane ka namjop ka la kyntiew kyrdan ba nyngkong ïa ka Mawpat na ka Group-B ryngkat ki 10 point na ki 4 sien ïakhun. Katba ka Umlyngka ha ka kyrdan ba saw da 4 point na ki saw sien ki jingïakhun.
Ha kawei pat ka jingïakhun, na ka Group C, ka shi kol na u Hosterfield Kharbudnah (45 minit) ka la biang pura ïa ka Mawkriah West SC ban pynliem ïa ka Gorkha Association ban khur ïa ki lai point. Kane ka namjop ka la kyntiew ïa ka Mawkriah West ha ka kyrdan ba ar na ka Group.
Ka Mawkriah West SC ka la ïoh mynta 9 point na ki 4 sien ïakhun bad ïaryngkat bad ka Umpling SC kaba bat ïa ka kyrdan ba nyngkong, hynrei ka dang sah sa shi sien ïakhun ban kynjoh saw sien ïalehkai.
