Ïoh ki nonghikai Deficit tang da ki jingaidaw bad ki jingpynthikna kiba thylli na ki Sahep sorkar: VPP

Shillong, Risaw 22: Ka Voice of The People Party (VPP) ka pynpaw ba ka ïeng pura bad ki jingïakhih jong ki nonghikai Deficit ha Meghalaya ba kin ïoh ïa ki hok jingdawa jong ki bad kumjuh ka jingdonkam ban ïada ïa ki hok ba dei katkum ki kyndon jong ki.
Katkum ka kyrwoh ba la pynlait da u President jong ka party u Bah Ardent Miller Basaiawmoit u la ong ba ki jingïakhih ba dangshen jong ki nonghikai Deficit kadei ka jingsngew kutlad kaba pynkynmaw ba kane ka la jia hapoh ka kynhun jong ki nonghikai halor ki jingeh jong ki kam shakri jong ki, kibym pat lah ban pynbeit haduh mynta.
“Ka long shisha kaba sngewkhia ba ki nonghikai kiba la aiti ïa ki jingim ban pynwandur ïa ka lawei jong ki samla pule ki khynnah skul bad ki khun ki kti jong ngi la shah pynbor ba kin shim ïa ki sienjam jingïakhih ban pynlong ïa ka sorkar kaba sngap ïa ki jingeh jong ki. Ki jingdawa jong ki, ba kynthup ïa ka CPF, DA arears, ki jingmyntoi da la shongthait bad kiwei ki kam shakri ki donkam ki jingshim khia kiba mardor bad ki jingshimkam katkum bad da ka jingbuh por ym ki jingaidaw jong ki ophisar bad ki jingpynthikna kiba thylli,” ong u President ka VPP.
U la ong ba ka VPP ka pynrem jur ïa ka jingleh bym suitñiew jong ki ophisar bad ki jingbym sngew sha ka kynhun jong ki nonghikai. “Ka kyrdan IAS kadei ka jingmut ban shakri ia ki paidbah ym ban kyntiew ïa ka jingmut ban sngewbahalor, halor kito kiba la aiti ba kin shakri. Ym don uno uno u Administrative ophisar khlem da kheiñ ïa ka kyrdan, un kheiñ ïa ki nonghikai kum kiba pohdor ne ban kyntait ïa ki jingdonkam jong ki tang na ka daw ba ki duna ka bor kum ki ophisar. Ki nonghikai kidei ki nongrim jong ka imlang sahlang,” bynrap ka VPP.
Na ka liang u nongïalam ka VPP u la ong ba ka sorkar ka bym burom ïa ki nonghikai kim lah ruh ban sngewthuh ïa ka jingkordor ba shisha jong ka pule puthi. “Ki bor pynïaid sorkar ki dei ban ïaid da ka lynti kaba sngewrit, ka jingkhuid ka rukom treikam da ki jingkheiñ kiba shai bad ba don jingsngew synei, ym da ka jinglong kaba pynduna ïa ki jingeh jong ki paidbah tang ban buh ha ki file bad ki jingpyndep rukom,” ong ka VPP.
Kumta ka VPP ka khot ïa ka sorkar jylla ban ïakren da kaba don jingmut bad ki seng ki nonghikai bad ban pynbeit ïa ki jingdawa ba don nongrim jong ki khlem da pynslem shuh naba ki nonghikai ki dawa ïa ka jingïoh burom, ym ki jingïapynïapher, ki donkam ka hok ym ki jingai daw, kumta ka VPP ka ïeng skhem bad ki nonghikai halor ki jingdawa ba shong nongrim jong ki.