Nongpoh, Rymphang 20: U Myntri rangbah ka jylla Assam, u Himanta Biswas Sharma u la kam ba ka party BJP ha kane ka kynti kan sa ioh ban thaw sorkar ha Meghalaya hadien jong ka election 2023 hapoh ka jylla Meghalaya.
Kum u myntri rangbah ka jylla Assam, u Himanta Biswas Sharman u la kam ba ka party BJP kan ioh ban thaw sorkar ha Meghalaya, ka dei hadien ba ha ka Sngi u Blei u la wan ban ïa kynduh ïa ka kyrtong ka BJP Nongpoh, ka Kong Marian Mariang ban ai mynsiem bad ban kyrshan ïa ka kum ka kyrtong ka party shuwa ban un leit ban shim bynta ha ka jingïalang ka party BJP kaba long ha Nongbah Shillong.
U la ong ruh ha kane ka kynti ka party BJP ka dei ha ka sein kaba nongkong eh ba ka lah ban pynieng ïa ki kyrtong na baroh ki 60 tylli ki Constituency ha Meghalaya bad kum ka party kam don jingartatien ba kan ioh ban thaw sorkar hadien jong ka election 2023 ha Meghalaya.
U la ïathuh ruh ba dang shen ha ka jingleit iuh kjat jong u ha Garo Hills na ka bynta ban ïalap election ïa ka party BJP, u la iohi ïa ka jingkyrshan ba radbah ki paidbah ban pynjop ïa ka party BJP bad wat ha Nongpoh ruh ka kyrtong ka BJP ka la leh bha bad trei shitom na ka bynta ka jingjop na kane ka constituency.
Namarkta, u la bynrap ruh da kaba ong ba ka party BJP kan dang trei shitom ha kine ki khyndiat sngi shuwa ban poi sha ka jingjied ïa ki nongmihkhmat ha ka jylla Meghalaya bad kum ka party ruh kan dang trei shitom na ka bynta ka jingjop jong ki kyrtong kaba ka party ka la pynieng ha baroh 60 tylli ki Constituency ba ka don ruh ka jingkyrmen kaba skhem ban ioh thaw sorkar na ka bynta ban wan rah ïa ka jingkylla hapoh ka jylla Meghalaya, u la bynrap.
Na ka liang ka kyrtong ka BJP na Nongpoh Constiteuncy, ka Kong Marian Maring ruh ka la pynpaw ka jingkmen bad ka jingsngew ioh mynsiem halor ka jingpynlait por u myntri rangbah ka Assam ban wan ai mynsiem ïa ka kum ka kyrtong ka BJP na Nongpoh bad ka kyrmen skhem ruh da ka jingkyrshan lang jong u myntri rangbah ka Assam kan poi sha ka thong jong ka jingjop.
Ha kajuh ka por ruh ka la pan ka jingkyrshan na ki paidbah ka Nongpoh Constituency ban ai kata ka jingkyrshan kaba pura ïa ka kum ka kyrtong ka BJP bad lada ka wan ha ka bork an lah ban leh shibun ki kam kiba khraw kiba long ka jingmyntoi na ka bynta ki paidbah ka Constituency kumba ka party BJP ka synshar ha ka ri bad wat ha Assam ruh la synshar da ka party BJP kaba ngi suk ban ïa trei lang na ka bynta ban wan rah ïa ki jingkylla hapoh ka jylla Meghalaya, ka la bynrap.
