Wad pynlong ishu politik ïaka kam pynbeit pud, ka sorkar MDA ka pynthikna ban pynbeit ïa u pud u sam daka jingmynjur ki paidbah:Conrad Sangma
Ki nongwad daw kim sngewthuh ïaka jingeh jong ki paidbah ha khappud
Nongpoh, Nailar 18: U Myntri Rangbah ka jylla u Conrad Sangma u la ther tyngeh ïaki nongwad daw kiba pynlong ishu politik ïaka kam pynbeit pud kaba ka sorkar MDA mynta ka dang don hapdeng ka lynti ban pynbeit noh ïa u pud u sam ha baroh ki jaka kajia pud bad ka jylla Assam hadien ba u la hiar sha ka thaiñ Mawhati hynnin ka sngi ban peit ïaka jinglong jingman ha katei ka thaiñ khamtam ki surok hadien bala lah ruh ban pynurlong ïa u surok Umsning-Jagiraod bala dep ban buh mawnongrim hynnin ka sngi ha Mawhati.
U la ong ruh ba dang shen haka jingïakynduh bad ki nongïalam jong ka Synjuk ki Rangbah Shnong jong ka Raid Nongtung u la iohi ïaki ummat ba lang haki nongïalam naduh u Syiem ka Raid Nongtung u Miwell Shadap kiba la pynpaw ïaka jingeh ba ki paidbah haki thaiñ khappud ki ïakynduh naka por shaka por mynta la bun phew snem hadien ba ki sorkar bala leit noh kim lah ban thaw pyrthei eiei.
U la ong ruh lada long ha kano kano ka rukom ka sorkar MDA kan pynthikna ban pynbeit ïa u pud u sam bad kito ki nongwad daw kiba shu wiar, ki dei ban leit ban jngoh da la ki jong ki khmat ïaka jingeh bad ka jinglong jingman haki thaiñ khappud, ban kynduh ïaki nongïalam bad ki paidbah haduh katno ki shem jingeh tang nakadaw ba ym thikna u pud u sam.
Halor ka jingpynbeit pud kaba la sdang ha kine ki 8 bad 9 bnai bala leit noh kila mih shibun ki jingkynthoh, hynrei u Conrad Sangma u la kren shai ba naduh ka por ba sdang ka jingïakren pynbeit pud ki MLA, ki ophisar kila leit ban jngoh sha man la ki shnong naka por shaka por ban pynlong ruh ki jingïalang paidbah naka bynta ban pynthikna ïaka jingkwah bad ka jingmynjur jong ki paidbah la ki kwah ban leit sha Assam ne Meghalaya, bad la shem ba kumba 95% ki paidbah ki mynjur ban wan sha Meghalaya, bad ka sorkar Assam ka burom ïakata, hynrei ki nongmad daw ki mih watla katta naka liang ka sorkar MDA ka dang khlaiñ ka mynsiem ban trei khamtam ha kaba ïadei bad u pud u sam.
“Ka jingïakynduh jong ki MLA ki ophisar, bad ki paidbah ha kine ki 8 bad 9 bnai bala leit noh ban pynbeit ïa u pud u sam kam pat ïahap eiei bad ka jingïakynduh naduh 50 snem mynshuwa” la ong u Conrad namar ka sorkar MDA ka don ka jingkitkhlieh naka bynta ban trei bad peit ïaka eh ka shon ki paidbah khamtam kaba dei ka ishu bala shu sahkut la slem jong ka jylla kumba ki paidbah ki khmih lynti ban ioh noh ïala u jong u pud u sam ba pura.
Shuh shuh u Conrad Sangma u la pynthikna ruh ïaki paidbah jong ka thaiñ Block II ha Ri-Bhoi bad kiwei kiwei ki jaka ki ban sa pynbeit shen, ba dei tang hadien bala shim ïaka rai bad ka jingmynjur jong ki paidbah, ngin sa shim ïaki lad ki lynti kiba bha tam naka bynta ban pynbeit ïa u pud u sam bad pynthikna ruh ba dei tang kane ka sorkar kaba lah ban pynthikna ïa kata bad kiwei kiwei ki ishu kum ka ILP bad ka ktien khasi haka khyrnit ba 8 jong ka riti synshar ka Ri India kaba la khmih lynti ruh shen kan sa urlong, u la bynrap.