La plie ïa ka jaka die dohkha ha Iaw Chyiap, kyntu u Dy. Director ban die da kiba khuid ba suba
Jowai, Nailar 18: Ka Jowai Presbyterian Church Market Management Committee mynta ka sngi kala ïoh ban plie paidbah ïa ka jaka die dohkha ne ka (Fish Retail Outlet) kaba don ha Iaw Chyiap Jowai bad kane ka jaka kala biang nadong shadong katkum ki jingdonkam jong ki tiar ki tar ban buh ïa ki dohkha ba kin long kiba khuid ba suba ban bam.
Ïa kane ka ïew la tei lyngba ka jingïarap pisa jong ka tnad Fisheries haduh 6 lak tyngka bad 4 lak tyngka na ka JPC kaba long baroh 10 lak tyngka, ïa kaba la dep ban issue haka 4.10.2021.
Hashwa ban plie ïa ka la don ka jingïalang ba lyngkot ba la pynïaid da u Rev. E. Nongpluh uba dei u Chairman ka Committee, la ïoh ruh ka jingpule na ka ktien U Blei bad duwai na u Tbn. H. Sutnga, ha ryngkat ka jingdonlang u kongsan ma J. Suchiang Dy. Director jong ka tnad Fishery ka sorkar jylla, u symbud kongsan ma R. Rymbui Superintendent of Fishery, u ma K. Siangshai, Retired Fishery Officer, West Jaiñtia Hills nalor kiwei de kiba la shah khot sngewbha.
U ma J. Suchiang haba ai jingkren u ai ka jingïaroh ïa ki nongpynïaid jong ka JPC Market Committee kiba la lah ban pyndep ban shna ïa kane ka jaka kaba la biang nadong shadong na ka bynta ban die sha ki paidbah ïa ki dohkha.
Ula kyntu ba dei ban buh da ki dohkha kiba pynmih napoh jylla hi namar kina ki dohkha ki long kiba khuid ba suba ban bam, da kaba kyntu ruh ba ym dei pat ban shim kabu na ki nongthied nongpet khnang ba yn ïoh jingmyntoi lang na baroh arliang naduh ki nongthied bad ki nongdie.
“Da ka jingkhuid jingsuba jong ka dohkha kaba don ha kane ka jaka (Fish Retail Outlet) kaba kynthup naduh ka Deep Freser kaba ïarap ban pynlait naka jingsniew kloi ka Dohkha, kan long shuh shuh kaba bha tam ban die paidbah, ha ka juh ka por u kyrkhu kyrdoh ba kane ka jaka die dohkha kan long kaba ïaid shakhmat ha kine ki sngi ban wan.
‘Ka jylla mynta ka la kiew bha ha ka jingpynmih dohkha kaba la poi sha ka 19 hajar matri ton ha ka shi snem da ka jingthum ban pynmih da ki dohkha kiba khuid ba susa lyngba ka “Meghalaya State Aquacultur
Shuh shuh ula ong hapoh ka West Jaiñtia Hills dang ha u snem 2021 la ïoh ïa kane ka ‘Fish Retail Outlet’ kata ha ki ar tylli ki jaka kawei ha Wahiajer bad kawei ha Jowai (Iaw chyiap), hashwa ban pynkut ïa ka jingïalang la ïoh ki kyntien ai khublei na u Secretary ka JPC Market Management Committee ma Tbn. J.B. Laloo.