Khliehriat, K’Lyngkot 13: U bah Arkijuh Dkhar, uba na East Jaiñtia Hills District u la pynpaw ka jingsngew khia halor ka jingbym kylla shuh ka bai kali ha East Jaiñtia Hills District kaba la buh dor naduh kato ka por ka khlam covid-19, halor kane utei u samla rangbah u la buh da ka jingthoh hakhmat u Deputy Commissioner ka East Jaiñtia Hills District.
Katkum ka shithi ba la buh myn ha ka 8 tarik mynta u bnai, u bah Arkijuh Dkhar, u la kyrpad ïa u Deputy Commissioner ban shim khia ban peit lem halor kane ka jingeh jong ki paidbah kiba shong kali kamai hapoh ka district khamtam kito kiba kamai na Khliehriat sha Lumshnong, Mynkre, Chiehruphi, Nongsning, u la ong ba ha kato ka por ba dang don ka khlam covid-19 lada shu buh kum ka nuksa lada ka bai kali na Khliehriat sha Lumshnong la buh dor T100 tyngka marwei hynrei kane ka dor ka dang neh sah haduh mynta ruh.
U la kyntu ïa u Deputy Commissioner ban peit lem ba ka bai kali kan long kaba beit bad kaba ryntih ïa baroh ki kali kiba kamai hapoh ka district ba kan nym buh jingeh ïa ki nong shong kali ba ka dor bai kali kan long ruh katkum ka jingjngai ka jaka.
