ïatreilang ka KHADC bad ki Dorbar Shnong ban pyntreikam hok ïa ka Aiñ wanrah jingkhuid jingsuba: CEM

Shillong, Kyllalyngkot 13: U Chief Executive Member (CEM) ka KHADC u bah Pyniaid Sing Syiem mynta ka Sngi Saitjain u la ong ba ka District Council ka ïatrei lang bad ki Rangbah Shnong jong ki shnong bapher bapher na ka bynta ban pyntreikam hok ïa ka KHAD (Solid Waste Management )Act ne ka aiñ ban wanrah jingkhuid jingsuba hapoh ki shnong ki thaw. U la ong ruh ba ka Council kan pyntreikam hok ïa ka Resource , Recovery Centre (RRC) ha man la ki shnong ki thaw namar ym tang ba kan wanrah ïa ka jingkhuid jingsuba hynrei kan ai kam ai jam ruh ïa kiba bun ki khun samla.
ïa kane u la kren ha ka jingïalang pynkup burom bad pyllait paidbah ruh ïa ka trok kit niut ba la ai da ka KHADC ha ka shnong Pokseh.
U bah Pyniaid Sing Syiem u la pynlait paidbah ïa ka trok kit niut ban pyndon ka ka shnong Pohkseh ha ka jingïalang paidbah kaba la pynlong ha phyllaw jong ka ïing dorbar.
Ha ka jingkren jong u CEM la ong ba ïa kane ka trok kit niut la pynïoh na ka skhim jong ka KHADC lyngba ka 15th finance commission tied grant, ha ka juh ka por ula ong ba dei ka jingstad jong ki riew rangbah ban pynïoh ïa ka Sixth Schedule ban ïoh ïa ka jingïada kaba kyrpang kum ka jaidbynriew.
Hapoh u pud u sam jong ka KHADC ki don 54 tylli ki hima, ba ka jingsynshar, ka don ka jingsynshar Syiem, Synshar Raid, Synshar shnong ha kaba baroh ki don hapoh ka jingpeit jong ka District Council.
Ha ka jingkren u Pa,iem Ainam Manik Syiem u la ai ka jingïaroh ïa ka dorbar shnong jong ka shnong Pohkseh ïa ka rukom pynïaid ïa ka shnong ka thaw bad kane ka paw na ka jingai ïa ki kaiphod ha kaba ïadei bad ka jingtrei kam jong ka shnong .
Ha kane ka sngi la ïoh ruh ban pynkup burom ïa ki 14 ngut ki nongshong shnong kiba la rangbah ha ka rta, ïa ki 7 tylli ki long ïing kiba juh pynkhuid ïa ka shnong, 7 ngut kiba trei ha ki jaka sam jingbam ïa ki khynnah bad lai ngut ki ASHA kiba trei hapoh ka shnong. ïa ka jingïalang la pynïaid da u bah K Paul Syiem rangbah shnong ha ka jingïadon lang ki nongkit kam ka shnong.