Ujor ka Shnong Umshangling sha u DC ka Ri Bhoi, ba wan tep khlem akor ïa ka met ïap

Nongpoh, K’lyngkot 13: Ki nongïalam shnong ryngkat ki riew rangbah bad ki Longkmie mynta ka sngi ki la hap ban kynduh kyrkieh ïa u Deputy Commissioner ka Ri Bhoi, u Abhilash Baranwal, kaba dei halor ka jingwan tep khlem akor ïa kawei ka met ïap ha ka jaka tep ïa ki met ïap ba ym don ba wan kam kiba haïing ha ka shnong Umshangling, kaba la jia hynnin ka sngi, haduh ba ki ksew ki la rong bad khlong ïa met na ka daw ka jingbym tep bha ïa ka met ïap.
Haba leit kynduh ïa u Deputy Commissioner ka Ri Bhoi la ïalam da u Rangbah Shnong u Bah James Maiong bad u Secretary Shnong u Bah Vincent Sohkhwai lem bad ki rangbah bad ki Longkmie, kiba la pynpaw ïa ka jingsngewkhia bad ki la aiti ruh ïa ka jingthoh ban ujor halor kane ka jingtep ïa ka met khlem da pyrkhat ïa ka koit ka khiah ki paidbah nongshong shnong.
Haba ïa kren bad ki Nongthoh Khubor, u Bah Vincent Sohkwai bad ka Longkmie ka Anjelina Tado, ki la ong ba kane ka jingwan tep khlemakor ïa ka met ïap ka long shisha kum ka jingibein ïa ki paidbah nongshong shnong bad tang na ka daw ka jingtep khlem akor ka la po shaduh u pud ba ki ksew ki leit khong ïa ka met bad wan rah ïa ki bynta ka dkhot met sha ki shnong kaba long shisha ka jingma ym tang ïa ka koit ka khiah bad ka long ruh ka jingijli bad ka jingkhein poh ïa ka shnong.
Ki la ong ruh wat lada don katei ka jaka tep met ïap ba la ai da ka shnong, kum ka shnong kan nym pdiang ïa kane ka jingleh khlem akor bad ka shnong ka la dawa na u Deputy Commissioner ba dei ban shim khia mardor bad lada ka long kumne ka shnong kan khang ban wan tep ïa ki met ïap bad la dawa ruh ba dei ban buh briew ban peit bad ruh ban pyntip sha ka shnong lada don ka jingtep ïa ki met ïap ba khlem wan kam ki bahaïing.
Halor kane ka jingujor ka shnong, u Deputy Commissioner ka Ri Bhoi, u Abhilash Baranwal, u la kular ban shim khia halor kane ka jingwan tep khlem akor ïa ka met ïap ha katei ka shnong bad u la ong ruh ba shen un sa lum ïa ka jingïakynduh lang naduh ka tnad Police, ka Nongpoh Town Committee bad ruh ïa ka bor District ba kin ïa kren kyrkieh halor kane ka jingjia, bad kum kane ka jingjia kam dei shuh ban jia, namar kane ka ktah shisha ïa ka koit ka khiah ki paidbah nongshong shnong bad kaba ym dei hi ruh ka rukom ban leh khlem akor ba ka ktah ïa katei ka shnong.