Hadien 52 snem ïoh ka jylla ïa ka skulbah ka Captain Williamson Sangma State University

Pynbna u CM ban plie ïa ka Shillong Campus

0

Shillong, K’lyngkot 13: Hadien ka jingkynjoh ka jingïoh ka jylla la jong mynta la kumba 52 snem, ha ka sien kaba nyngkong eh ka jylla ka la ïoh ïa la ka jong ka skulbah ha kaba u Myntri Rangbah ka Jylla Conrad K Sangma ha ka sngi Nyngkong, ula plie paidbah ïa ka State University ba nyngkong eh ka Jylla-ka Captain Williamson Sangma State University da kaba pynbna ruh ba ka Sorkar kan sa pynkha sa ïa ka Campus ha Shillong khnang ba kan ïarap ïa ki samla pule.
U la ong ba ïa ki jingtei jong kane ka University la plie ha u Kyllalyngkot 2023. Ha u Jylliew 2018, ka sorkar ka la mynjur ban tei ïa kane ka skulbah ha ka jingmang tyngka kaba la kot T.16.96 klur. Ïa kane ka skulbah la ai kyrteng ha u Myntri Rangbah ba nyngkong eh ka Jylla u Captain Williamson Sangma.
U la ïathuh ba ha u snem 2011, ka jingthaw ïa kane ka University ka dei kaba la pynwandur nyngkong kum ka Captain Williamson Sangma State Technical University ban pynïasoh ïa ki Technical College hapoh ka Jylla. Hynrei ha u 2022, ka Sorkar Jylla ka la pynkylla kyrteng ïa kane ka University kum ka Captain Williamson Sangma State University, ban pynthikna ba baroh ki technical bad non-technical college kin ïoh ban pynïasoh lang ha kane ka skulbah.
Da kaba kheiñ ïa kane ka jingplie ïa ka skulbah kum ka sngi sah jingkynmaw, u Myntri Rangbah ula ong, “Kane ka skulbah kan ym shakri tang ha ka Higher Education hynrei kan kyntiew ruh ïa ki kam wadbniah ne research bad ka jingwanrah ïa ki buit treikam ba thymmai ne innovation, ka ban wanrah ïa ka jingkylla ha ka kam pule puthi kaba donkam hapoh ka Jylla.”
U Myntri Rangbah u la ong ba ka jingpyntreikam ïa kane ka University ka dei ka jingkular jong ka Sorkar ïa ki paidbah ka Jylla. “Ha kine ki palat 50 snem, ka jylla kam shym la don ïa la ka jong ka University. Ka jingthaw ïa ka University ba pynïaid hi da ka jylla ka dei ka jingpynshisha ïa ka jingshimkhia jong ka Sorkar ban kyntiew ïa ka jingkiew shaphrang bad ka roi ka san ha ka pule ka puthi,” u la ong.
“Ka University kan ym dei tang ka kyrteng, ka dei ka jingkular. Ka jingkylli jong ka jingkyrmen, ka jingkiew shaphrang, ki lad ki lynti ki bym lah ñiew na ka bynta ki paidbah ka Meghalaya,” ong u Myntri Rangbah.
U Myntri Rangbah ula pynbna ruh ba ka Sorkar kan sa pynkha sa ïa ka Shillong Campus jong ka University, ka ban ïarap ha ka ban pynsuk ïa ka jingtreikam bad kumjuh ruh ïa ki samla pule ka Ri-lum Khasi bad Jaiñtia.
“Kane ka University kan sdang treikam noh naduh mynta bad baroh ki College hapoh ka jylla ki lah ban jied ha ka ban aplai ban pynïasoh bad la ka jong ka University,” u la pyntip haba pynpaw ba ka jingpynïasoh bad la ka jong ka University kan pynthikna ba ki samla pule kin ym donkam shuh ban hap leit ïakhun ïa ka Common University Entrance Test (CUET) ha ka ban leit pule under-graduate bad post-graduate course ha ki college ba ïasoh bad ka Captain Williamson Sangma State University.
U la pyntip ba ka CUET kan treikam tang ïa ki college kiba ïasoh bad ka North Eastern Hill University (NEHU), Shillong.
U la ong, “Nga kyntu ïa ki College ba kin shim ïa kane ka kabu bad pynïasoh noh sha ka Captain Williamson Sangma State University ha kaba ka Sorkar Jylla kan ai jingïarap ïa ki jaka pule ba pynïasoh ha kat ki jinglah jong ka ban pynthikna ba kin kiew shaphrang.”
Ha kane ka sngi kiwei kiba la kren ki kynthup ïa u Deputy Speaker Timothy D Shira, ki MLA kum u Sanjay A Sangma, Ian Botham K Sangma, Subir Marak, Sengchim Marak, Jim Sangma, Limison Sangma, Marthon Sangma, Vice Chancellor University, Prof. Vasanthi Vijayakumar, CEM ka GHADC Albinus Marak, Deputy CEM Nikman Marak, bad kiwei.
Ka University Grants Commission (UGC) ka la ithuh ïa ka Captain Williamson Sangma State University kat kum ka kyndon 2(f) jong ka UGC act 1956 lyngba ka shithi ba la phah ha ka 6 tarik Nohprah 2024.

Leave A Reply

Your email address will not be published.