Kitbok ka RBDSA ïa ki rang bad thei ïalehkai phutbol ban leit sha Jowai na ka bynta ka Meghalaya Games

0

Nongpoh, K’Lyngkot 14: Ka Ri-Bhoi District Sports Association mynta ka sngi kala ai ka jingkitbok kitrwiang ïa 32 ngut ki rang bad ki thei ïalehkai phutbol ka Ri-Bhoi District shuwa ba kin leit ïashim bynta sha ka Meghalaya Games 2025 kaba la pynlong ha West Jaintia Hills District.
Ha kane ka sngi lah wan ban ai ka jing kitbok kitrwiang da u Bah Fedynald Kharkamni President ka KSU North Khasi Hills District Unit ha ka jingdonryngkat lang u Bah Luistar Lyngdoh President ka FKJGP North Khasi Hills District, u Bah RB Shadap President ka RBDSA, u Bah Rangkynsai Makdoh Adviser ka RBDSA, ki nongkitkam ka RBDSA, ki dkhot ka seng lem bad kiwei kiwei.
Naka liang ki nongïalam ka RBDSA bad kumjuh ruh ki nongïalam sengbhalang haba kren ha katei ka sngi kila ai ka jingkitbok ïa baroh ki rang bad ki thei ïalehkai ba kin ïalehkai bha ha katei ka lympung, ba kin sei bad pyndonkam hok ïaka sap kaba ki don ryngkat ka jingkyrmen ba kin wanrah ka nam bad ka burom ïaka district baroh kawei.
Kila kyntu ruh ïaki samla ban im haka akor ka burom haba ki leit ban ïashim bynta ha katei ka lympung bad kum ka jingdon bynta bad ka kynhun jong ka Ri-Bhoi naka liang ka seng KSU bad FKJGP kila noh synñiang ruh da ka song pisa ban kyrshan lem ïaka jingdonkam bad ka jinglut jingsep jong ki.

Leave A Reply

Your email address will not be published.