Dei ban pynshitom ïa kito ki ophisar ba donkti ban pynslem pynkhreh ïa ka jingkheiñ jingdiah : CAG

Shillong, K’Lyngkot 13 : Ka Khasi Hills Autonomous District Council (KHADC) ka la shah bthah ba ka dei ban pynshitom ïa ki briew kiba la tip kum ki jingkhein jingdiah ha ka snem (Annual Accounts).
“Ka Council ka hap ban pynshitom kumba dei pyrshah ïa kito ki ophisar kiba donkti ban pynslem ban pynbiang ïa ki jingkhein jingdiah bad shim ruh ïa ka sienjam ban pynkhreh ïa ka jingkhein jingdiah kaba haduh mynta (up-to date financial statements) ha ki por ban sa wan,” la ong ka kaiphod jong u Comptroller bad Auditor General of India (CAG).
Shuh la ong ba lada donkam, ïa ki shuh shuh ban phah pyntbit da kaba kaba ïa ki jaka ai jingïapher ka jong ka jingeh bad kaba trei lang bad ka District Council Affairs Department.
La ong ba ka Fund Rules jong ka Jaiñtia bad Garo Hills Autonomous District Council (JHADC bad GHADC) ka ong ba ïa ka Annual Financial Statement dei ban pynkhreh da u dkhot ba dei peit ïa ki kam pisa tyngka bad phah sha u Principal Accountant General (PAG)/Accountant General (AG) hapoh ka 30 tarik u Jylliew man la u snem.
Ka Fund Rules jong ka KHADC, pynban, kam shym la kdew ïa kano kano ka tarik ba la buh ban aiti ïa ki Annual Accounts sha ka PAG/AG.
Ïa ki jingkhein jingdiah jong ka Council na ka bynta u snem 2018-19 la aiti sha ka PAG ha u bnai Jylliew 2021, da kaba pynslem la jan ar snem, la ïathuh ka kaiphod CAG.
Ka Council ka pynïaid ïa ki jingtreikam bad ki kam bapher bapher jong ka da ki 635 ngut ki briew kiba don (90.84 percent) ïa ka jingbun briew ba la mang kaba long 699 ngut.
Ka jingpeit bniah ka la lap ba ka Council ka don 19 ngut ki nongtrei ha ka tnad Accounts (Lber 2019), kynthup arngut ki nongtrei ba la buh na ka bynta ban leh ïa ka jingkhein jingdiah kiba hapoh lane internal audit. Kam shym la don kano kano ka kam kaba lait ha ka tnad Finance and Accounts jong ka Council bad baroh ki nongtrei kiba la phah na ka bynta ka Accounts bad Audit ki la shah hikai na ka bynta la ki jong ki jong ki kam.
“Watla ka don ki nongtrei ba la pyntbit katkum ka bor ba la mynjur, ka Audit ka la ïohi ïa ki jingduna kiba ïai bteng ha kaba pynbiang ïa ki jingkheiñ jingdiah kum ka jingbym pynbiang ïa ki kot ki sla kiba ïadei, ka jingpynïapher bakla ïa ki jingïoh bad jingpynlut bad ki jingduna ha ka rukom pynïaid ïa ka pisa da ka district council (ADC),” la pynpaw ïa ka kaiphod.
Ka la ong shuh shuh ba ka Financial Statements ka dei ka jingpyni kaba la buh ryntih ïa ka jingdon pisa bad ka jingpyntreikam ïa ka pisa. Kumta la ong ba ka jingthmu jong ki jingkhein pisa ka long ban ai jingtip shaphang ka jinglong jingman jong ka pisa, ka jingtreikam ha ka liang ka pisa bad ka jingmih pisa jong kano kano ka tnad kaban pynmyntoi pat ha kaban shim rai bad bishar bniah kumno ban mang ïa ka rukom pynïaid ïa ka.
“Namar ka jingpynslem ban pynkhreh ïa ki jingkheiñ jingdïah ryngkat bad ki jingduna ha ki jingkheiñ jingdiah, ym shym la lah ban bishar bniah kumno la pyndonkam ïa ka,” ong u CAG da kaba ai jingmut shuh shuh ba ka Council ka lah ban pynthikna ban aiti ïa ki jingkheiñ jingdiah ba man la u snem sha u Principal Accountant General kham kloi bad ban pyntip ruh ha ka por ba ki aiti.