17 tylli ki bympat sdang pyntrei, 14 kiba ladep pyntrei bad 32 ki dei kiba lajan dep artat

Shillong, Jylliew 16 : Ka Sorkar Meghalaya ka la kyntait halor ka jingmih khubor kaba la kynnoh ba 17 tylli ki project ka DoNER ki dei kiba “sahkut hajuh bad ki bym pat sdang ban pyntrei ïa ki kam”, ka long kaba bakla bad ka bym shisha satia namar khlem da wad bniah bha shwa ban pynmih namar kine ki dei ki projek ki bym pat sdang ban pyntrei hi ruh haduh mynta.
Ha ka kyrwoh ba pynlait da ka sorkar ha ka sngi Ba-ar, ka Sorkar Jylla ka la pynpaw ba ka jingpynïaid ïa ki kam ba dang long nod lane 0% ka la long tang na i shibynta na ka kaiphod ka Ministry of DoNER jong u Jymmang 2026 bad iehnoh ïa ki jingbatai kiba bniah kiba don ha kane hi ka kaiphod. Ka jingmih ka long ka jingpynsngewthuh bakla ïa u paidbah, kaba sngewsih jur bad ka bym long ka jingshisha”.
Ka Sorkar lyngba ka Commissioner & Secretary ka Planning, Investment Promotion, Sustainable Development Department, ka la ai ïa kane ka jingpynshai halor ka khubor kaba la pynmih ha kawei ka kot khubor phareng ka Jylla.
Kat kum ka jingpynpaw na ka Sorkar, kane kajuh ka kaiphod ka DoNER ka pyni ba ka jingpyntrei ïa ki project da ka Meghalaya ka long kaba ïaid beit ïaid ryntih.
Na ki 81 tylli ki projek ba la khmih bniah, kumba 57 % ki dei kiba la jan pyndep lane lah don ha ka bynta ba khatduh ban pyndep. 14 tylli ki project ba shongdor 200.92 klur tyngka ki dei kiba la dep pyntrei 100% , katba 32 tylli kiwei pat ki long hapdeng 75 bad 100% ba la dep pyntrei. Halor kane, ka kyrwoh ka ong, ka Jylla “ka don ha ka kyrdan ba hakhmat eh ha ka jingpyntreikam ïa ki Project hapoh ka thaiñ Shatei Lam Mihngi”, ka mat kaba la pynjah ha ka khubor.
Ka Sorkar ka la pynshai ba ka “0% physical progress” ne ka jingbym pat sdang ïa ka kam, ba la pynmih ha ka kaiphod khmih bniah kam dei ka jingbisharïa ka jingbym lah pyntrei hynrei ka mut ba ki kam kim pat sdang kat haduh ka sngi ba pynmih ïa ka kaiphod.
Ka la ong ba kane ka ju long ka rukom haba ïadei bad ki project ba la bei tyngka dang shen bad kiba dang ïaid lyngba ka jingmynjur ïa ka DPR, ka jingkhot tender bad ka jingaiti ïa ka kam.
“Ban shu ñiew ïa kine ki project kum kiba sahkut lane bym pat pyntrei, kam pyni satia ba kumno ka jingkhmih bniah ïa ki project ka ïaid” ong ka kyrwoh.
Na ki 17 tylli ki project ba la buh ha ka thup 0%, 11 tylli ki dei kiba la khmih da ki Tnad Sorkar bad ki dang don mynta hapdeng ka jingkhot tender bad ïa kiba la khmih lynti ban sa aiti ïa ki work order hapdeng u bnai Jylliew bad Naitung 2026.
Ki hynriew tylli kiwei pat ki dei kiba la bei tyngka beit beit da ka DoNER sha ki central agency kum ka NESAC, NECTAR, IICA bad NPCCL, bad ka jingpyntreikam ka shong beit ha kine ki agency ym ha ka Sorkar Jylla.
Haba pynskhem ba ki jingbishar jong ki nongthoh khubor ki long kiba “pdiang sngewbha bad ba donkam”, ka Sorkar ka kyntu pat ba dei ban thoh ïa baroh ki jingbatai ba bniah jong ka kaiphod khnang ba ki nongpule kin nym shah pynsngew thuh bakla tang na ka shi line jong ka kaiphod”.
Ka la ban biang ba ka Sorkar Jylla ka la kut jingmut ban pyndep ïa ki project hapoh ka por kaba la buh bad ban bteng ha ka jingkhmih bniah ïa baroh ki kam ba la dep bei tyngka khnang ban weng ïa ki jingeh kiba wit hakhmat.