Naduh ka 1 tarik Naitung yn pyntreikam noh ïa ka VB-G RAM G, yn pyndam noh ïa ka MGNREGA

Shillong, Jylliew 16: Ka Sorkar India ka la pyntreikam ïa ka Viksit Bharat – Guarantee for Rozgar and Ajeevika Mission (Gramin) Act, 2025 kaba wanrah ïa ka jingkylla kaba khraw na ka MGNREGA sha ka VB-G RAM G ka ban treikam naduh ka 1 tarik u Naitung, 2026.
Ka Sorkar India ka la pynbna ba ka Viksit Bharat – Guarantee for Rozgar and Ajeevika Mission (Gramin) Act, 2025 (VB-G RAM G) kan sdang treikam ha ki thain nongkyndong ha kylleng ka Ri, naduh ka 1 tarik u Naitung, 2026. Ba ïa kane, ka Mahatma Gandhi National Rural Employment Guarantee Act (MGNREGA), 2005 ynsa pyndam noh.
Ka VB-G RAM G Act ka ai ïa ka jingkular ban aikam da kaba pynkiew na ka 100 sngi sha ka 125 sngi ha man la ka shisnem na ka bynta ki longing ha ki thain nongkyndong kiba don ki dkhot kiba la san l rangbah kiba kloi ban trei ia ki kam hapoh jong ka skhim. Ka jingthmu ka long ban pynkhlaiñ ïa ka ïoh ka kot bad ka ïoh kam ïoh jam lyngba ka bainong ba ki ïoh na kane ka skhim, bad ban ai ka jingkyrshan ruh de ka ka khambha ia ki longing kiba kham duna ka jingïoh, kaba long ruh ka thong jong ka Viksit Bharat @2047.
Ki bynta ba kongsan jong ka Aiñ:
Ka jingpynkhlaiñ ïa ka kular ban aikam: Ka jingkular ban ai kam 125 sngi ha man la ka shisnem na bynta ki longing ha ki thaiñ nongkyndong kiba kloi ban trei.
Ka jingkylla kaba shngaiñ ïa ki nongtrei: Ki Job Card kiba la dep leh ïa ka e-KYC kin dang bteng ban treikam tad haduh ba la sam da ki Gramin Rozgar Guarantee Card bathymmai.
Ka jingïoh jingsiew lada khlem ïoh ïa ka kam ba la dawa: Lada ym lah ban aikam ha ka por ba la buh, ki nongtrei kin ïoh jingsiew la kumno kumno shibynta la saw na ka dor bai sngi na bynta ki 30 sngi nyngkong bad shiteng na ka dor bai sngi hadien kata.
Ka jingsiew biang por: Ka jingsiew kan poi beit sha ki bank account/post office lyngba DBT, ha kapor kaba biang bad kan don ka jingsiew lada slem.
Ka jingpynbun ïa ki jaitkam ban trei: Ïa ki kam ha kane ka aiñ thymmai la phiah ha ki saw bynta kita ki long ki kam ban pyntrei ha kaba ïadei bad ki um, ki jingtrei/jingshna kiba donkam ha ki shnong, ki jingtrei kiba lah ban ai kam ai jam, bad ki jingtrei ki ban ïada na ka jingkylla mariang.
Ki jingdonkam ha ki jaka trei: Ka aiñ ka pyntikna ban ai ka um dih um bam bakhuid ba suba, jaka rieh tngen, jaka shongthait, ki tiar bad ki dawai ai jingsumar, ki jaka ban buh bad peit ïa ki khyllung khynnah ha ki jaka trei, bad ki lad ai jingïarap ha ki jingjia aksiden.
Ka jingpyntrei ïa ki kam katkum ka juk technology: Ka jingpyndonkam ïa ka biometric, mobile-based monitoring, geo-tagging, real-time dashboards, bad ka jingpynkhlaiñ ïa ki social audit.
Kat kum ka Sorkar Pdeng, ka jingkylla na ka MGNREGA sha ka aiñ thymmai VB G RAM G kan long kaba “ïaid beit ïaid ryntih khlem jingthut”. Ïa ka MGNREGA yn sa pyndam noh ha ka 1 tarik Naitung, 2026, bad ynsa pyntreikam noh da ka VB-G RAM G Act ha kajuh ka sngi. Ki kam ba dang ïaid bad ki jingtei paidbah ha ka MGNREGA kiba dang sah ban trei pyndep yn kham pynleit jingmut bad ban pyndep noh ïa ki kham kloi.
Ka rukom bhah pisa na ka sorkar pdeng sha ki jylla ka long 90:10 na ka bynta ki jylla Shatei Lam mihngi ka Ri India bad ki Jylla rilum, katba ka jingbhah ka long 60:40 na bynta kiwei pat ki jylla bad Union Territories kiba don Assembly, bad 100% na ka sorkar pdeng na bynta ki Union Territories ki bym don Assembly.
Kane ka aiñ ka buh bad wanrah ïa ka jingai kam ai jam ha ki thaiñ nongkyndong khnang ban pynkiew ïa karoi ka par ha ki shnong ki thaw lyngba ka jingpyntrei ïa ki jingshna kiba neh slem, kaba ïaid ryngkat bad ka thong jong ka Viksit Bharat @ 2047. Lyngba kane ka jingkyrshan kam bad ka jingïarap ban kyntiew ïa ka ïoh ka kot, kane ka rukom treikam ka aibor ïa ki shnong/Village Employment Council ban ïalam bad pynkhreh da ki Viksit Gram Panchayat Plans, ban pynkiew ïa ka roi ka par na ka bynta ka bhah kam ïa ki paidbah.
Ka aiñ ka phai khmat ruh shaka jing pynneh pynsah, ka jingïada ïa ka mariang bad ka jingpynkhreh ïa ki jingjia ba wan lynshop na ki bor mariang, ban pynlong ïa ki shnong nongkyndong ba la khreh ban ïada na ki jingeh ha ka lawei bad kumjuh ruh ban pyntrei ïa ki jingtei/jingshna kiba neh kiban nangpynkhlaiñ ïa ka ïoh ka kot ha ki shnong ki thaw.