Tura, Jylliew 16: Ki nongtrei ka Tura Campus Staff Welfare Association jong ka skulbah North Eastern Hill University (NEHU) Tura Campus ki la pynbna ïa ka jingïakhih da kaba sangeh trei kam kaba sdang mynta ka sngi Ba-ar, da kaba kynnoh ba ki jingkyrpad ba man ka por sha ki bor pynïaid jong ka skulbah bad ki bor ba dei khmih halor ki katto katne ki jingeh jong ki nongtrei kim shym la lah ban pynbeit.
Ha ka shithi ba la thoh sha u Vice Chancellor jong ka NEHU, ka Association ka la pynpaw ïa ka “jingsngewsih bad jingsngewkhia kaba jur” halor kaei kaba ka la batai kum ka jingbym lah jong ki bor ba dei khmih ban jubab ïa ki jingdawa ba shisha jong ka wat hapdeng ki katto katne ki jingpynpaw ba la ai kham mynshwa.
Ka Association ka la pynpaw ba namar ka “jingbym don jingsngewrit bad jingbym sngewthuh satia” kaba la pyni ïa ki jingeh jong ki nongtrei, ka la hap ban pynlong da ka jingïakhih naduh ka 16 tarik u Jylliew.
Napdeng ki mat jingdawa ba kongsan ba la pynpaw da ka Association ki long ka jingpyntreikam ïa ka Departmental Promotion Order (DPOT), ka jingbishar bniah ïa ki jingkynnoh ba la pynkiew kyrdan bad pynhiar kyrdan beaiñ, ka jingpyllait mardor ïa ki jingmyntoi ba la ai, ka jingpynrung kyrteng kloi ïa ki nongtrei hapoh ka Employees’ Provident Fund (EPF), bad ka jingai tulop ha ka por kaba biang ïa ki nongtrei.
Ka seng jong ki nongtrei ka la ong ba ka kyrmen ba ki bor pyniaid jong ka skulbah kin shim khia mardor ban weng ia ki jingeh bad ban ïada na ka jingjur shuh shuh jong ka jinglong jingman.
Ïa ki kopi jong katei ka shithi la phah sha u Pro Vice Chancellor ka NEHU Tura Campus, sha u Myntri Rangbah ka Jylla Meghalaya, sha ki ,Heads of Departments and Sections sha u Vice President ka Post Graduate Students’ Union (PGSU) Tura Campus bad ki nongialam ka Garo Students’ Union (GSU).
Ka Association ka la bthah ruh ïa ki dkhot jong ka ban ïalum lang hakhmat ka Administrative Building hadien ba la buh jingthoh ïa ka jingwan poi ha la ki jong ki jong ki tnad (department) bad ki bynta ha ka sngi ba sdang ka jingïakhih.Ki nongshet jingshet bad ki nongtrei farm la pyllait noh na kane ka jingiakhih.
