Ka jingwan ki nong jngohkai pyrthei kiba nabar ri sha Meghalaya kan kiew ha ki snem ban wan: Pabitra Margherita

Shillong, Nailur19: U myntri khynnah ka sorkar pdeng ba peit ia ka tnad External Affairs bad Textiles u Pabitra Margherita u la pynpaw ïa ka jingshaniah ba ka jingwan ki nongjngohkai pyrthei sha Meghalaya kan kiew bha ha ki snem ban wan, da kaba kdew ïa ka jingitynnad jong ka mariang jong ka jylla, ka jingpher jong ki kolshor nalor kiwei de.
Haba batai ïa ka Meghalaya kum kawei na ki jaka ba itynnad tam ha ka pyrthei, u Margherita ka la ong ba ka jingitynnad jong ka jylla ka ïaid shabar jong ki lum bad ki jingthung jingtep kiba jyrngam.U la pynpaw ïa ka jingriewspah jong ka ïa ki jingthaw ba im, ki jingthung jingtep, ki jaka ba itynnad, ka rukom im jong ka thain, ka kolshor bad ki jain tynrai kum ki jingpynbyrngia ba kongsan ïa ki nongwan jngohkai.
U la ong ba kine ki jinglong ba kyrpang ki donkam ban pyni kham bha ha ka kyrdan jong ka pyrthei khnang ba ki nongjngohkai pyrthei na ki bynta bapher bapher jong ka pyrthei kin lap ïa ka mariang bad ka kolshor jong ka Meghalaya.
U Margherita u la ong ba ka Sorkar Pdeng ka dang shim ïa ki katto katne ki sienjam ha ki kyrdan bapher bapher ban kyntiew ïa ka kam jngohkai pyrthei ha Meghalaya bad ha kylleng ka thaiñ Shatei Lammihngi.
Ki jingpyrshang ki long ban kyntiew ïa ka jinglah jong ka thaiñ ha ka kam jngohkai pyrthei bad ban pynkhlain ïa ka jingdon jong ka ha ka map jngohkai pyrthei jong ka ri India bad ka pyrthei.
U la pynthikna ruh ba kan bteng ka jingkyrshan na ka sorkar pdeng na ka bynta ki projek pynroi kiba ïadei bad ka kam jngohkai pyrthei ha Meghalaya.
U myntri sorkar pdeng u la ong ba da kaba pynkhlain shuh shuh ïa ka jingitynnad jong ka mariang, ka kolshor bad ka pateng tynrai jong ka jylla, ka Meghalaya ka lah ban iohi ïa ka jingkiew kaba khraw ha ka jingwan ki nong jngohkai pyrthei nabar ri ha ki snem ban wan.