Shillong, Nailur 20: Ka North East Zone Inter-State Badminton Championship 2026 ka la poi sha kaba kut ha ka sngi Saitjaiñ (19 tarik Nailur, 2026) ha JN Indoor Stadium ha kaba ka Assam ka la pynkut kum ka kynhun kaba khur bun tylli ki takma.
Ka Assam ka la jop san tylli na ki jingïakhun final ha ka ‘individual championship’, katba ka Mizoram bad ka Manipur ki la jop mar ar sien bad ka Arunachal Pradesh kawei.
Ha ka sngi Palei ka Assam ka la jop lut ïa baroh ki jingïakhun jong ka ‘Team Championship’ ha ka kyrdan ïakhun jong ka Men’s, Women’s, U-19 boys’ bad U-19 girls’.
ïa kane ka lympung la pynlong da ka Meghalaya State Badminton Association (MSBA) ryngkat ka jingkyrshan jong ka Directorate of Sports and Youth Affairs, hapoh ka jingpeit jong ka Badminton Association of India.
La wan kongsan ha ka sngi kut da ka Director General of Police ka Meghalaya, ka kong Idashisha Nongrang IPS, kaba la sakhi ïa ka jingïalehkai ba khatduh jong kane ka sngi, kata ka final jong ka Men’s Doubles.
Haba ai jingkren kum ka kongsan, ka kong Idashisha ka la ai khublei ïa baroh ki nongjop takma bad ai mynsiem ruh ïa kito ki bym shym la jop. “Ka jingïalehkai badminton ka dei ka bynta jong ki samla namar ka donkam ïa ka jingsted bad jinglah shah ban ïalehkai. Ka long kaba sngewtynnad shibun ban ïohi ïa kiba bun ki nongïalehkai kiba don sap kiba mih na ka thaiñ shatei lammihngi,” ka la bynrap.
Kane ka lympung kaba saw sngi lynter ka la pynïasoh lang ïa palat 270 ngut ki nongïalehkai bad ki nongpynïaid na ki 8 tylli ki jylla jong ka thaiñ.
Ka sngi ka la sdang da ka jingïakhun phainal jong ka U-19 Girls’ Single, ha kaba ka Gargi Saikia ka la pynliem ïa ka paralok na Assam ka Noimikha Saikhia da 15-3, 15-9. Kumjuh ruh ka phainal jong ki shynrang ha kane ka kyrdan ka la long hapdeng arngut ki nongïalehkai na Assam, bad hangne u Prangan Choudhury ula pynliem noh ïa u Arnav Protim Borgohain da 15-9, 15-10.
Ha ka phainal jong ka U-19 pat la jop da ki nongïalehkai jong kiwei pat ki jylla. ïa ka Boys’ Doubles la jop da u Manku Taku bad u Gyurmey Tseten ban pynthikna ïa ka takma ksiar kaba tang kawei na ka bynta ka Arunachal Pradesh. Ki la pynliem noh ïa ki arngut ki nong Mizoram, u Malsawmhlua bad u Vanlalhruaia Sailo da 15-7, 10-15, 16-14.
Ka Lalrinhlui Hmar bad ka Zoramthari Renthlei jong ka Mizoram ki la pynliem noh da 15-13, 13-15, 15-8 ïa ka Avikaa Borgohain bad ka Bhavishya Changmai na Assam ban jop ïa ka U-19 Girls’ Doubles.
Nangta ka phainal jong ka Mixed Doubles la sakhi ïa u Vanlalpekhlua bad ka Lalrinhlui Hmar kiba la jop da 16-14, 15-11 pyrshah ïa ki shijur jong ka Manipur, u Truman Kalo bad ka Konsam Gunjan.
Ha ka kyrdan jong ki Senior, u M Hemam bad u P Konjengbam na Manipur ki la long ki nongjop ha ka Mixed Doubles da kaba pynliem ïa u Swarnaraj Bora bad u Bhavishya Changmai ka Assam da 15-10, 12-15, 15-8.
ïa ka takma ksiar jong ka Women’s single la khur da u Avikaa Borgohain na Assam hadien ba jop da 15-11, 9-15, 15-12 pyrshah ïa ka Lalrinkimi na Mizoram. Nangta ka Men’s Single ka jingïakhun ka la long hapdeng arngut ki nong Assam, ha kaba u Himanish Das u la pynliem ïa u Orijit Chaliha da 15-17, 15-9, 15-12.
Ka Manipur ka la long ka lahduh jong ka Women’s Doubles hadien ba ka M Kshetrimayum bad ka SM Devi ki la jop pyrshah ïa ka Bhavishya Changmai bad ka Gargi Saikia da 15-10, 15-8 ha ka phainal.
Khatduh eh, ka phainal jong ka Men’s Double, la sakhi ïa u T Boruah bad u N Choudhury jong ka Assam kiba la pynliem noh da 15-11, 11-15 bad 15-7 ïa u Choidrup Lobsang bad u Samuel Tamang jong ka Arunachal ban khur ïa ka takma ksiar.
Hadien ba ladep baroh ki jingïakhun la pynbud sa ka jingïalang sam khusnam, ha kaba baroh ki nongjop ki la ïoh pdiang ïa la ki jong ki takma, kynthup ruh ïa ki nongïalehkai ka jylla Meghalaya. Ka jylla ka la pynkut da saw tylli ki takma rnong kiba la pynthikna ha ka sngi Thohdieng. Kine ki long ka Elsarica Umdor (women’s single), ka Netania T Tariang (girls’ singles), ka Netania bad u Gavin Kharbuki (U-19 mixed doubles) bad ka Gitchiak Bregim A Sangma bad u Sonnal Joshi (senior mixed doubles).
Kine ki khusnam ki long kiba kongsan na ka bynta ka jingtrei shitom kaba ki la theh ha kine ki bnai ba la dep ha ka jingpynkhreh na ka bynta kane ka lympung bad kumjuh ruh ïa ka National Games kaba 39 jong u snem ban wan, kaba ka Meghalaya kan sa pynlong.
