Khrui hiar ki MLA bad MDC ka UDP sha Mawphlang ban pynithuh ïa u kyrtong MP

Shillong, Jylliew 16 : Jan baroh ki MLA bad MDC jong ka United Democratic Party ki la hiar sha Mawphlang ha kane ka sngi Ba-ar ban leit pynithuh ïa u kyrtong jong ka party u Bah Vivanstone GK Kynta na bynta kane ka elekshon MP shiteng samoi.
Nalor u President jong ka Party Bah Metbah Lyngdoh bad General Secretary Bah Titos Chyne, ha kane ka jingïalang kaba long ha Mawngap Mawkharshiing, ki MLA kiba la poi ki kynthup naduh u MLA ka Mawphlang, Bah Beyondstar Kurbah, MLA ka Sohiong Bah Synshar Lyngdoh Thabah, MLA ka Ranikor Bah Pius Marwein, MLA ka Shella Bah Balajied Synrem, MLA ka Mawsynram Bah Olan Sing Suin, MLA ka Mowkaïaw Bah Nujorki Sungh, MLA ka Khliehriat Bah Kyrmen Shylla bad kumjuh ki MDC ba kynthup ïa u MDC ka Shella Bah Barikupar Synrem bad MDC ka Mairang Bah Equator Nongrang.
Ha kane ka jingïalang jong ki nongkitkam jong ka party kiba wan na kylleng ki constituency jong ka East Khasi Hills na ka liang u President ka party Bah Metbah Lyngdoh u la ong ba lada phai dien biang sha ka elekshon MP Lok Sabha kaba long ha u snem 2024, ka pynshaiong hi ngaiñ ïa ki nongïalam ka party baroh kawei khamtam haba ka rukom ïoh vote ka long markhongpong na kaei kaba ki khmih lynti.
“Lada phai sha ka elekshon ha u snem 2024 la shaiong shisha bad dei na kane ka daw ba ka UDP da kajuh ka mynsiem ba ki nongïalam APHLC bad HPU ki don ha kato ka por ngi la kut jingmut ban pynmih, pynsah bad pynkhlaiñ ïa ka mynsiem long trai ri trai muluk,” u la ong.
Nangta u ong ruh ba halor ka jingpynieng kyrtong na ka bynta kane ka elekshon shiteng samoi, ma u kum u President bad ka party ki la pdiang ïa ka rai ban don ïa u kyrtong watla na ka liang ka HSPDP ka khlem pat ai ktien ban ïatrei lang ha kane ka elekshon. U ong ruh ba haduh mynta ïa kane ka kam ki la iehnoh ha ki hi ban pyrkhat.
“Ha ka por ba ngi wad ïa u kyrtong, ngi la buh ka thong ba ngim kwah shuh tang ban shu sei ïa u kyrtong uba nang tang ban kren hynrei uba tbit ruh ban ïasaid na ka bynta ka jylla jongngi baroh kawei.”
U President u ong ruh ba watla ki party bapher bapher kin sa wan ban pynksan ïa la ki kyrtong kyrtong hynrei ka nongrim jong ka UDP ka skhem ka long ba ki kwah bna pynskhem ïa ka tynrai jong ka jinglong trai ri trai muluk bad ruh ban pynkhlain shuh shuh nangne shakhmat ïa ka jinglong trai jong ka Jaidbynriew.
“Ngi kwah ba ka jinglong trai muluk trai jaka ka dei ban dang neh bad ruh ban pynkhlain shuh shuh nangne shakhmat. Kumta donkam ym tang nongkren hynrei u nongïasaid ha Parliament kiba da tip ïa ki ain ki kanun ban ïasaid na ka bynta ka jinglong tynrai jong ka Jaidbynriew,” u la bynrap shuh shuh.
Shwa kane, u Bah Metbah u la pynpaw ïa ka jingkmen kaba khraw ban ïohi ba jan baroh ki MLA jong ka party ki la poi lut sha katei ka jingïalang pynithuh kyrtong.
Shuh shuh u ong ruh ba watla mynta kim pat tip lano ka elekshon kan long hynrei u la ong pat ba kane ka jingïalang mynta ka long ban pynithuh ha ki nongkitkam ïa u kyrtong ba ka party ka sei na ka bynta ka elekshon MP shiteng samoi.
Katba na ka liang u Bah Titos u la ong ba ka UDP ka dei kaba eh daw bha ha man la ki elekshon shiteng samoi. U la pynkynmaw ruh ba ki elekshon shiteng samoi ba ka party ka jop ki kynthup naduh ha Ranikor kabala jop da u Bah Pius Marwein, nangta ha Shella ba la jop da Bah Balajied Synrem, ha Mawphlang ba la jop da Bah Eugene Lyngdoh bad kumjuh ha Sohiong ba la jop da u Bah Synshar Thabah.
“Ngi dei kiba eh daw bha ha ka elekshon shiteng samoi bad kumta ngi kyrmen bad ngi khmih lynti ba ngin jop biang ha kane ka elekshon shiteng samoi mynta ka kynti ruh,” u la ong.
U kyrtong ka party, Bah Vivanstone u la ong ba lada u jop kum u MP, ka thong ba hakhmat eh jong u ka long ban pynkhlain bor shuh shuh ïa ka Khyrnit kaba Hynriew kaba mut ban pynkhlain ïa ki District Council ha Khasi bad Jaintia. “Lada duh ki District Council, la sloi ka bor jong ki Syiem bad ki Dorbar Shnong,” u la ong.
Ha ka jingïalang la ïoh ruh ïa ka jingkren na baroh ki MLA jong ka party kiba la pynpaw ïa ka jingkyrmen ba da ka jingïatreilang ki don ka jingkyrmen ba u kyrtong jong ki un poi sha ka thong.