Hadien 16 sngi la pynkit noh ïa u Marshall sha Woodland Hospital, Sabahmuswang ba la tlot palat
Khot jingïalang ka sorkar ïa ka JCOMSWA ha Secretariat
Jowai, Jylliew 16: Namar ka jingjur palat jingtlod jong ka met na ka jingshah thngan kaba la kynjop sha ka 16 sngi mynta ka janmiet jong ka 16 tarik u Jylliew ïa u bah Marshall S. B. Biam, President jong ka JCOMSWA (Jaintia Coal Owners, Minder, Suppliers & Workers Association) la pynkit noh sha ka jaka sumar jong ka Woodland WK Hospital Sabahmuswang West Jaiñtia Hills District.
Haiden ka jingpynkynriah ia utei u President sha Hospital la wan mih pli ban bteng ïa ka jingshah thngan da u ma Jesper Thoo uba dei u Member jong ka JCOMSWA na ka shnong Rymbai.
Na ka liang ki nongïalam ka Jaiñtia Coal Owners, Minder, Suppliers & Workers Association kila pynbna paidbah ba ka jingïakhih kan dang ïaibteng beit tad haduh ban da ïoh ka jingjubab kaba shai na ka sorkar ban pyllait biang ïa ka jingtih dewïong hapoh ka District kum ba long ha ki por mynshwa.
Katkum ka shithi bala phah sha u President bad General Secretary ka JCOMSWA da u Deputy Commissioner ka East Jaiñtia Hills District la pynbeit ba kan don ka jingïalang lashai ka sngi 17 tarik u Jylliew bad u Chief Secretary jong ka sorkar jylla ha Secretariat Shillong, ha kaba la khot ïa ki nongïalam ba hakhmat ka seng ban wan mih sha katei ka jingïalang.