SHILLONG, Jylliew 17: Ki nongkyrshan jong u khlur ïalehkai phutbol ba kynsai tam ha ka Pyrthei, u Lionel Messi, kaba la tip kum ka Argentina & Messi Fan Club Meghalaya, ha ka 17 tarik u Jylliew 2026, ki la leit ban pynkup burom ïa ka samla Sanfida Nongrum, ha ïingsah jong ka kaba don ha Langkyrding Lane-8.
Kum ban shu kdew, ka samla Sanfida, ka la long kawei na ki thei ïalehkai ba kongsan jong ka kynhun India kaba la rah ïa ka nam lahduh ha ka lympung SAFF Women’s Championship 2026 da kaba pynliem ïa ka Bangladesh ha ka final ha ka 06 tarik Jylliew ha Goa.
Ka Sanfida, 21 snem ka rta, kaba ïalehkai na ka Garhwal United FC, ka la mih madan nyngkong ïa ka kynhun ba la rangbah jong ka ri ha kaba sdang jong une u snem, ka la pynkhihjar ha ka phainal bad hashwa kata ka la thep ïa ka namtam ha ka semifinal bad pynkut ïa ka lympung ryngkat ka khusnam Most Valuable Player.
Ka jingthmu ba sha lyndet jong ka Argentina Messi Fan Club Meghalaya haba ïadei bad ka jingleit pynkup burom ka long shi bynta ban mynsiem ïa ka Samla Sanfida ba kan dangtrei shitom ha ka kam ïalehkai bad ban pynshlur ïa kiwei pat ki para samla ba kin trei shitom la ka long ha kino kino ki bynta ha ka jingim jong ki, khnang ba kan wanrah nam ïa ka Jylla bad ïa ka ïing ka sem ruh kumjuh.
Ka kyrteng jong ka Samla Sanfida Nongrum ka la paw ha kylleng ka Ri India, namar ka jinglah jong ka ban thep ia ka goal ha ka jingialehkai.“Ka Kmie jong ka Sanfida Nongrum ka la pdiang sngewbha ia ki nongialam ka Argentina Messi Fan Club Meghalaya bad ka la pynpaw ia ka jingsngewkmen.
“Kane kadei ka jingleh sngewbha kaba rit eh bad ka long ruh shibynta ban ai mynsiem ïa ka Samla Sanfida ba kan dang trei shitom ha ka kam ïalehkai,” la ong u President ka Argentina Messi Fan Club Meghalaya.
