Nongpoh, Jymmang 20: Ka Ri Bhoi Students Union mynta ka sngi ka la ujor syndon da ka ehjer sha u SP ka Ri Bhoi ban pyrshah halor ka jingkynnoh ba la don ka jingdie tuh ïa ki umphniang da ki trok kit umphniang ha Ri Bhoi bad ki la ujor ruh da ka ejehar ka dei hadien ruh ba la mih ha ki lad pathai khubor ba la don ka jingkynnoh ba ka don ka jingdie tuh ïa ki Umphniang da ki Dribar jong ka Kali kit Umphniang.
Na ka liang ka RBSU tang hadien ba la mih ha ki lad pathai khubor ba la kynnoh ba ka don ka jingdie tuh ïa ka umphniang ha Ri Bhoi bad ba la kynnoh ruh ba ka Kompani ka kyntait ban buria ïa ka bailut ksan ki trai pump, ka seng ka la shim ïa kane ka ra ban ujor da ka ejehar sha u SP ban dawa tohkit bad ban kem ïa kito kiba don kti ha kitei ki kam beain.
Haba ïa kren bad ki nongthoh Khubor, u President ka RBSU, u Samla Everjoy Nongpluh bad u Working President ka RBSU, u Samla Amberlight Masharing, ki la ong ba kane ka jingkynnoh ba ka don ka jingdie tuh ïa ka umphniang ba kynthup naduh ka petrol bad diesel ka ktah ïa ka burom jong ka Ri Bhoio bad kino kino kiba don bynta ha katei ka kam kumba la shah kynnoh ha ki lad pathai khubor dei ban tohkit bad ban kem khnang ba kum kine ki kam beain kin nym don jaka ha Ri Bhoi.
Ki la ong ruh kumba la kynnoh ba da ki spah litar ka umphniang ki jah rngai bad ynda haba la poi sha ki petrol pump ki la duna litar bad kane kan ktah beit ïa ki paidbah, ha kaba ki trai pump ki hap ban leh tuh ha ki meter tang ban lait na kajingduh nong, namar na ka liang ka Kompani ka kyntait ban siew ïa ka bai buria.
Namarkata, na ka liang ka seng ka kyrpad ïa u SP ba un phah ban tohkit mardor halor kane ka kam beain jong ka jingdie tuh ïa ki umphniang bad kane ka jingkynnoh kumba la mih ha ki lad pahthai khubor ka ktah ym tang ïa ka burom ka District bad ka ktah ruh ïa ki paidbah kiba pyndonkam ïa ki umphniang ba khlem pep kan don ka jingleh tuh lehrieh da ki trai haba ki la duhnong lypa da ki spah litar haba poi ka umphniang sha ka petrol pump, ki la bynrap.
