Jowai, Jymmang 20: Ka Hynñiewtrep Integrated Terri torial Organization (HITO) Sahsniang Area West Jaiñtia Hills mynta ka sngi Thohdieng hapoh ka jingïalam u President samla Overfive Biam kala leit ban buh jingujor haka office treikam jong u Executive Engineer (EE) PWD ha Shangpung Sub Division halor ka jingorpait bad jingtrei torti ka rukom shna ïa ka kynroh jong ka jingkieng Mynsar kaba pynïasoh na Umsalait sha shnong Iooksi.
Ka seng kala dawa bad ai jingmut sha ki bor ba dei khmih ban nym pat shah ïaki kali heh ban ïaid lyngba kane ka jingkieng ban lait naka jingjia ba sngewsih, shuh shuh ka seng ka kyntu ïa ki bor sorkar ba kin shim khia ïa kane jingujor khamtam ban pynbha ïa ka kynroh jong katei ka jingkieng kaba la jur ka jingorpait.
U samla Overfive Biam ula ong ka jingleit jurip ïa kane ka jingkieng ka long hadien ba la ïoh ka jingujor na ki paidbah nongshong shnong kila hiar sha katei ka jingkieng bad lap ba ka kynroh jong ka jingkieng kala sdang orpait bad ka lah ban khyllem syndon.
Ula ong ba kane ka jingorpait ka kynroh ka lah ban dei na ka daw ka jingleh torti jong u Contractor khlem da pyntrei bha ïa katei ka kynroh bad kane kala buh jingma ïa ki paidbah nongleit nongwan.
