Jowai, Jymmang 20: Ka Khasi Student Union Jowai Unit hynnin ka sngi hapoh ka jingïalam u President Ewanmi Phawa, General Secretary Leonard Dhar lem bad ki dkhot ka seng kila leit ban jurip ïa ka ophis District Commerce & Industries Centre kaba don ha Mihmyntdu.
Ha katei ka sngi ka seng kala lap ïa ka jingdkhoh ka rukom jingtrei kam jong katei ka ophis kaba ai jinghikai (training) ïa kiba bun jait na ka bynta ki samla ba kin seng kam la jong.
Ka seng ka la ïoh ban ïa kynduh ïaki nong incharge kane ka ophis, ha ka jingïakren bad ka Functional Manager (F.M) jong katei ka ophis kala ong ba don shibun ki training kiba don hapoh ha katei ka ophis kiba kynthup kum ki Tailoring, Knitting, Carpenter, Computer, ki schemes bad kiwei kiwei, kiba dei ban ai sha ki paidbah khamtam ïaki samla. Hynrei haka jinglap jong ka seng pat ba don sa tang ar tylli ki jait training kiba dang trei kam kata Tailoring bad Knitting.
Halor kane naka liang ka KSU Jowai Unit kala dawa na katei ka office ba ka dei ban shim ka jingkitkhlieh ban pyntreikam biang ïa baroh kitei ki training kiba pher bapher kiba don ha ka bad ka seng kala pyntip ba kan nang ïai buddien ïa kane.
La ïathuh ki jingai training ba don ha katei ka ophis ka ai jingmyntoi ïaki samla jong ka District hi baroh kawei khamtam kumno ba kin ïeng hala ki jong ki kjat ban seng ïa ki kam la jong, pynkut ka kyrwoh na u samla Nidapoi Shadap Publicity Secretary ka Jowai Unit.
