‘U Bah Shakliar um ju shim lada ngi phun’ Ong ki nongïalehkai bym ïohi ki khmat

Shillong, Kyllalyngkot 18: Ki nongïalehkai kynjatbol bym ïohi ki khmat kiba hapoh ka shatri jong ka Meghalaya Blind Football Association ne ka MBFA, kin sa leit ban mihkhmat ïa ka Jylla ban ïashim bynta ha ka lympung ïalehkai kynjatbol kaban sa long ha Nongbah Bengaluru jong ka Jylla Karnataka.
Katkum ka jingïathuh u Bah Risinius Pathaw President jong ka MBSA ba ha kaatei ka lympung ïalehkai kynjatbol kaba la tip kum ka All India Blind Super League kin sa mih madan ha ka 23 tarik Kyllalyngkot 2024.
U la ïathuh ba kane kadei ka sien kaba nyngkong ba un ïalam ïa kane kynhun kaba dang thymmai kiba don 7 ngut bad kin mih na la ka jong ka Jylla lashai ka sngi Thohdieng ka 19 tarik Kyllalyngkot 2024 katba arngut ki la don lypa ha Bangalore.
Kum ka jingpynkhreh na ka bynta ban leit aireng bad kiwei ki kynhun ha Bangalore, kane ka kynhun hapoh ka jingïalam u Bah Risinius Pathaw ki la ïoh ban kilan met ïalade ha ka madan kynjatbol ha Pohkseh.
Kane ka kynhun ka la pan ruh ka jingkyrshan na ki paidbah nongshong shnong ka Jylla ba kin buh lem ha ka jingduwai khnang ba kin lah ban poi suk sha ka jaka ba kin leit bad ba kin ïoh ïa u soh jong ka jingjop ban wanrah nam bad burom ia ka jylla.
U Bah Risinius Pathaw President ka Meghalaya Blind Football Association haba kren sha ki nongthoh khubor, u la ïathuh ba na ka liang jong ki shuwa ba kin leit ïashim bynta ha ka lympung ïalehkai kynjatbol ha Bangalore ki la pyrshang ban phun ïa u Bah Shakliar Warjri Myntri jong ka tnad Sports ban wad ki lad jingiarap hynrei kim ju ïohlad ban iakren.
“Haduh mynta ngim pat ïoh jingïarap na ka tnad ïalehkai. Ngi lah phun ïa u Bah Shakliar Warjri hynrei katba call switch off lane ïoh ruh um ju shim,” ong u Bah Risinius. U la ïathuh ba kat haduh mynta nalor ba ki pynlut nalade, ki la ïoh ruh ki jingïarap pisa na ki nongmihkhmat ba kynthup na u Bah Vincent H Pala, Bah Prestone Tynsong bad na u Bah AL Hek.