Shillong, Kyllalyngkot 18: Ka jingangnud kaba la slem bha jong ka shnong Jatah Lakadong ha Mawkynrew Constituency lem 18 tylli ki shnong ba marjan ban ïoh ka madan ïalehkai kaba bïang paka naduh ki jaka shong peitkai, ki jingker bad kiwei pat ka la urlong ha ka 17 tarik u Kyllalyngkot, 2024 haba u MLA ka thaiñ, u Bah Banteidor Lyngdoh u la wan ban pynbna ban shna noh ïa ka ha ka mang tyngka kaba long 2 klur 65 lak tyngka.
U MLA ha kane ka sngi u la plie ruh ïa u mawnongrim kum ka dak ban sdang noh ïa ka jingshna pynbha ïa kane ka madan ïalehkai phutbol ha ki bynta bapher bapher jong ka.
Ïa kane ka jingthmu shna pynbha ïa ka madan ïalehkai ka long ruh ha ryngkat ka jingangnud u Bah Banteidor ban kyntiew ïa ka kam ïalehkai ha ka thain bad ba ki samla kin ïoh ïa ka madan kaba bïang paka ban pyntbit ïalade ha ki jingïalehkai bapher bapher.
Haba kren ha ka jingïalang, u Bah Banteidor u la ong ba naduh ba u wan ban long kum u MDC naduh u snem 2014 u don ka jingangnud ban kyntiew ïa ka thaiñ bad ka dei haba ki paidbah ki la ai ka jingshanïah da kaba tynrong ïa ka kam MLA ha u 2018 u la ïoh ïa ka kam kum u Myntri ba dei khmih ïa ka tnad Sports bad hangne u la ïoh kham bun ka lad ban kyntiew ïa ka thain naduh ki surok, ki jaka sumar nalor kiwei pat.
Da kaba pyntip ba ki don bun tylli ki projek ban kyntiew ïa ka kam ïalehkai kiba u la wanrah, u la ong, “Ka Indoor Stadium ha Jongksha kaba dang ïaid sha khmat ha kaba tei ïa ka ha ka mang tyngka ba 22 klur, ka madan ïalehkai ha Mawber, Thangsning bad kiwei pat kin long ki matti na ka bynta ki samla”.
U la ong ba ynda la dep ka jingshna pynbha ïa ka madan kan long ka jingmyntoi ym tang ïa ka shnong Jatah Lakadong hynrei ïa ïa ki 18 tylli ki shnong ha kane thaiñ.
U la pynkynmaw ba um shym la lah ban wanrah ïa ka mang tyngka shwa ka elekshon MLA 2023 namar ba la treikam ka aiñ elekshon. U la ong ki la don kiba la kynnoh ba u shu kular kai hynrei da ka jingïatreilang bad ki paidbah u la jop bïang bad kane ka madan mynta kan urlong hapoh ar snem.
Ha kane sngi, la ïa donlang ruh da ki ophisar na ka Mawkynrew C&RD Block, na ka tnad Sports, ki nongïalam shnong, ki riewrangbah nalor kiwei pat.
Hadien kane u Bah Banteidor u la aiti ruh ïa ki jain syaid sha ki nongshong shnong ka thain bad ïa shim bynta ruh ha ka jingïalehkai phutbol paralok da ki rangbah ha katei ka shnong.
