Tura, Kyllalyngkot 18: Ka jingïalehkai jong ka athletics ha ka lympung ïalehkai jong ka Meghalaya Games kaba San ka ba la long ha Tura, West Garo Hills District, ka la lap ba poi noh sha kaba kut mynta ka sngi.
Bad ha kine ki lai sngi jong ka jingïakhun u Skhemlang Suba ka Ri Bhoi bad ka Glorify Kurbah ka EKH ki la ïoh ba kin rah ïa ka nam kum u rang ne ka thei ïalehkai ba kynsai (best athlete).
Na ka lïang u Skhemlang ka daw kaba la pynlong ïa u ba un ïoh ban rah ïa kane ka nam ïalehkai ba kynsai ka lympung ka la wan hadien ba u la lah ban pyndep kham sted ïa ka thong ha ka jingïakob mareh kaba 800M hadien ba u la lah ba un pyndep ïa ka thong ha ka 1:54.7 sec, kaba la bïang pura ïa u ba un ïoh ban khur 897 poin, katba na ka lïang ka Glorify Kurbah, ka la ïoh ba kan khur ïa kane ka nam hadien ba ka la lah ba kan pyndep ïa ka thong ka ïakob mareh kaba 800m da ba kaba ka la lah ba kan pyndep ïa ka thong ha ka 2:21.5 sec bad khur 809 poin.
Haba khein kyllum pat ïa ka rukom ïalehkai ha baroh ki lai sngi jong kane ka jingïalehkai, ka kynhun jong ka West Jaintïa Hills District kaba la ïoh ba kan khur 17 tylli ki takma ba kynthup 8 tylli ki takma ksïar, 4 ki takma rupa bad 5 ki takma rnong, ka kynhun kaba wan ba-ar dei ka Ri-Bhoi District hadien ba ka la ïoh ba kan khur 15 tylli ki takma ba kynthup 6 ki takma ksïar, 6 ki takma rupa bad 3 tylli ki takma rnong, katba ka kynhun ïalehkai jong ka East Khasi ka la wan ban bat ïa ka kyrdan kaba lai hadien ba ka la ïoh ba kan khur 10 tylli ki takma ba kynthup 5 ki takma ksïar, 3 ki takma rupa bad 2 tylli ki takma rnong.
