Khliehriat, Nailar, 11: Ka jingtwa khyndew hajan ka Tunnel ha Sonapyrdi na ka jinghap jong u slap ha ka step sngi Thohdieng ka la wanrah ïa ka jingdheng kali ha surokbah National Highway-6 ha Sonapyrdi.
Ka jingtwa jong ka khyndew ktieh kaba la pynjyrsieh ïa ka surok haduh ba ki kali kim long shuh ban ïaid.
Da ka jingshimkhia jong ki nongtrei jong ka National Highway Authority of India (NHAI) ban pynkhuid ïa ka khyndew ktieh kaba la hap ha surok kumta ki kali ki la lait ban ïaid tang hapoh khyndiat kynta.
Kum ban shu pynkynmaw, naduh ki bnai kiba la leit na ka liang ka ophis jong u Deputy Commissioner bad ka tnat Pulit jong ka East Jaiñtia Hills District ki la kyntu ïa ki paidbah nongleit nongwan kiba ju ïaid na kane ka surok National Highway ba ki dei ban rah lypa ïa ki jingbam bad ka um khnang ba kan ym buh jingeh namarba ym lah ban tip ha kano kano ma ka por kan jia ka jingdheng kali ha ka thaiñ na ka jingtwa khyndew.
La ju kyntu ruh ïa ki nongñiah kali ba kin long husiar bad kiba adkar haba ñiah kali ban ym pynher stet haba ïaid lyngba kane ka surok.
