Mawkyrwat ‘Nailar, 11: Ki runar bym lah ithuh ki la leit kyndang ïa ka kamra jong ka Principal ka Mawthawpdah Presbyterian Higher Secondary School ha kaba ki la rong tuh ruh haduh T. 3 lak.
Katkum ki tyllong khubor na ki Pulit, la ïathuh ba ha ka ejahar ba la ujor ha ka sngi Thohdieng da ka Principal jong ka skul ka Kong Wantimon Mawa, ka la pyntip ba ha ka sngi Palei ha ka por kumba 11:30 baje mynstep hadien ba ka la wan phai biang sha skul na ka jingshim shuti ba ka shitom ka la lap ba ka la don ka jingshah pynjulor jong ka kamra ba ka shong.
Ha kane ka jinglap jong ka, la ong ba ki runar ki la pynpait ïa ka tala bad ka duli ba buh ïa ki tiar ka la shah pynpait bad lap ruh ba pisa kaba haduh T. 3 lak ka la jah.
Ha ka jingïakren bad ka Kong Mawa, ka la ïathuh ba kane ka pisa kaba la jah ka dei ka pisa na ba ka skul ka thmu ban pyndonkam ban thied Uniform bad kiwei de ki jingdonkam jong ka skul.
Halor kane ka jingjia Pulit ki la register case bad ka jingtohkit ka dang ïaid shakhmat ban ïohkem ïa ki runar kiba donkti.
