Tuid da ki hajar ban sakhi ïa ka jingpynïasoh u MLA bad MDC barim ka Umsning sha ka NPP

0

Nongpoh, Kyllalyngkot 06: Da ki hajar ngut ki paidbah ka Umsning Constituency mynta ka sngi ki la tuid sha ka jingïalang ka party NPP kaba la long ha Madan Patarim, Umsning, na ka bynta ban sakhi ïa ka jingwan pynïasoh u MLA ka Umsning, u Bah Jason Mawlong bad u MDC barim ka Umsning, u Bah Donkupar Sumer lem bad kiwei ki nongïalam na kiwei ki party sha ka party NPP, kaba long shi bynta ka jingpynkhreh ban pynkhlaiñ ïa ka party NPP na Umsning Constituency ha kane ka election 2023 hapoh ka jylla.
Kum ban pynpaw paidbah, u Bah Jason Mawlong, u dei u MLA ba jop na ka party PDF ha ka election 2018 na Umsning bad u Bah Donkupar Sumer pat u dei u MDC barim ka UDP bad u Working President ka UDP na Ri Bhoi bad ha kane ka kynti ki la phai khmat noh sha ka party NPP khamtam u Bah Jason Mawlong u ban sa long u kyrtong ka NPP na Umsning Constituency ban aireng ha kane ka election 2023 na Umsning Constituency.
Ha kane ka jingwan pynïasoh kine ki ar ngut ki nongïalam paidbah na Ri Bhoi sha ka party NPP, nalor ki hajar ngut ki paidbah la wan ruh ban sakhi naduh ka jingdon lang u Myntri rangbah ka jylla, u Conrad K. Sangma, u Symbut Myntri ka jylla, u Bah Prestone Tynsong, u State President ka NPP, u Dr. W.R Kharlukhi, u Bah Sniawbhalang Dhar, Minister in-charge ka tnad Urban Affairs, u MLA ka Jirang, u Bah Sosthenes Sohtun, ka Dr. Ampareen Lyngdoh, u Ma Ngaitlang Dhar, ka MDC ka Umsning, ka Kong Macdalyne Mawlong bad kiwei kiwei ki nongïalam ka party NPP.
Haba kren ha kane ka jingïalang ,naduh u Myntri Rangbah ka jylla, u Conrad K. Sangma, u Symbud Myntri ka jylla, u Bah Prestone Tynsong, ka Kong Ampareen Lyngdoh bad u Bah Jason Mawlong ki la pan ka jingkyrshan kaba radbah na ka ki paidbah ka Umsning Constituency bad ki paidbah ka Ri Bhoi ban pynjop don burom ïa ka party NPP ha kane ka election 2023 hapoh ka jylla.
Kitei ki nongïalam ka party NPP ki la pynpaw ruh ba dei tang ka NPP kaba shah kawang ktieh bad shah kren beiñ ha kiwei ki party wat la kane ka party ka la leh shibun ki kam kiba khraw na ka bynta ka jingmyntoi ki paidbah hapoh ka jylla bad wat la katta ruh ki la pynpaw ba ai ba kiwei kin dang kren beiñ bad kum ka party kaba ieng pat na ka bynta ki paidbah kan ïai trei bad ki paidbah hi kin ai ïa ka rai ha kane ka election 2023 hapoh ka jylla.
Na ka liang u Bah Jason Mawlong bad u Bah Donkupar Sumer ruh haba kren ha kane ka sngi ki la pynpaw da kaba ong ba ka daw kaba la pynlong ïa kine ban wan pynïasoh sha ka Party NPP, ka dei halor ka nongrim ba dei tang kane ka party kaba lah ban synshar hapoh ka jylla bad dei ha kane ka party ba shibun ki jingkylla ki wan hapoh ka jylla ba ki paidbah kin ioh jingmyntoi bad khamtam ka dei ka party kaba nud ban kren ïa ki mat ki jura jong ka jaid bynriew.

Leave A Reply

Your email address will not be published.