52 ngut ki kyrtong pynbna ka TMC, yn ïakhun biang u Dr Mukul na ki ar Constituency

Shillong, K’lyngkot 06: Ka All India Trinamool Congress (AITC), Meghalaya Pradesh ha ka sngi Thohdieng ka la pynbna ïa ka kyrteng jong ki 52 ngut ki ki kyrtong ki ban aireng ïa ka elekshon MLA ka ban sa long mynta u snem. Ha kane ka thup kaba nyngkong jong ki 52 ngut, ki don 8 ngut ki MLA 7 ngut ki MDC.
Haba kren sha ki lad pathai khubor, u President ka TMC Meghalaya u Bah Charles Pyngrope u la ong ba kane ka jingpynbna kyrtong ka kyrmen ba ki paidbah kin ai lad ïa ki kyrtong kiba ka party ka la sei a bynta kane ka elekshon.
U nongïalam ka Parliamentary Party u Dr Mukul Sangma haba bynrap lang ïa kane u ong ba ka TMC kat haduh mynta ka dei tang ka party kaba lah ban pynbna haduh 52 ngut ki kyrtong ha ka juh ka sngi.
U la ong ba kane ka jingai tiket ïa kine ki 52 ngut ruh ka dei kaba la dep pyrkhat sani bha bad kaba ka party ruh ka la dep tih bniah shuwa ban ai tiket ïa ki.
Ha kane ka thup kaba mynta ki don kumba 5 ngut ki kynthei kiba ai reng na ka tiket ka party.
Haba kylli halor ka jingrai jong u Dr Mukul ban ïakhun na ki ar tylli ki constituency, u Dr Mukul u la ong ba ka jingrai jong ban ïakhun ka dei beit namar ka jingdawa u paidbah ym namar ba u tieng ïoh u rem lada u ïakhun tang na Songsak ka constituency kaba u mihkhmat mynta ka kynti.
“Kin sa mih ki jingkynthah ba ka jingïakhun jong nga na Songsak bad na Tikrikilla kan dei ba nga tieng ne ba nga kwah ban jop na ki ar tylli ki seat bad kumta terter hynrei nga kwah ban ïathuh ïa phi dei hadien ka jingïapyrkhat sani ba nga sa shim ïa ka rai ban ïakhun na kine ki ar tylli ki constituency,” u la ong.
Lah ban kdew hangne ba u Dr Mukul u la ïakhun na ki ar tylli ki constituency kata na Ampati bad Songsak bad u la jop ruh na ki ar tylli ki constituency bad hadien pat u iehnoh ïa ka Ampati ban pynïakhun pat da ka khun jong u da ka khun jong u ha ka elekshon shiteng samoi
Ki kyrtong kiba ka TMC ka pynbna ha kane ka sien ki kynthup u Bah A. Andrew Shullai na Jowai, Lasting Suchiang na Mookaïaw, Sunida Bareh na Khliehriat, Alban K. Gashnga na Amlarem, Dr Saralin Dorphang na Mawhati, Sunmoon D. Marak Jirang, Gilbert Nongrum Umsning, George B. Lyngdoh (MLA) Umroi, Banshanlang Lawai Mawryngkneng, Samborlang Diengdoh Pynthorumkhrah, Elgiva Gwyneth Rynjah North Shillong, Iwan Maria West Shillong, Ïan A. Lyngdoh Nongkynrih South Shillong, Gilbert Guidingstar Laloo Mylliem, Charles Pyngrope (MLA) Nongthymmai, Joannes Jefferson Tyler Lamphrang Lamare Nongkrem, Stodingstar Thabah Sohiong, Mawkordor Rynjah Mawphlang, Vincent T. Sangma Mawsynram, Playness Khiewtam Shella, Edmund Khongngai Pynursla, Harold Firming Khongsit Sohra, Dondor Mawbaniang Mawkynrew, Macmillan Kharbani Nongstoin, Fernandez S. Dkhar Rambrai-Jyrngam, Justine G. Momin Mawshynrut, Savio Phrangsngi Dkhar Ranikor, Sounder S. Cajee Mawkyrwat.
Katba na rilum Garo ki kyrtong kiba la pynbna ki kynthup na Kharkutta u Cherak Watre Momin (MDC), Mendipathar Pardinand D. Shira (MDC), Resubelpara – Rinaldo D. Shira (MDC), Bajengdoba – Tengrak R. Marak, Songsak – Dr Mukul M. Sangma, Williamnagar – Alphonsush R. Marak (MDC), Raksamgre – Dr Prabir D. Sangma, Tikirkilla – Dr. Mukul M. Sangma, Phulbari – S.G. Esmatur Mominin, Rajabala – Dr Mohammed Mizanur Rahamankazi, Selsella – Agassi R. Marak (MDC), Dadenggre – Rupa M. Marak, North Tura – Rupert M. Sangma, South Tura – Richard Mrong Marak, Rangsakona- Zenith M. Sangma (MLA), Ampati- Miani Dalbot Shira (MLA), Mahendraganj- Dikkanchi Dalbot Shira (MLA), Salmanpara – Winnerson D. Sangma (MLA), Gambegre –Sadhiarani M. Sangma (MDC), Dalu – Sengkal A. Sangma, Rongra-Siju – Dr Rajesh M. Marak, Chokpot – Lazarus M. Sangma (MLA), Baghmara – Dr Saljanringrang R. Marak.
Lah ban kdew u Bah Shitlang Pale u MLA na Sutnga-Saipung uba ryngkong lang bad u Dr Mukul na ka Congress sha ka TMC u khlem mih kyrteng satia ha kane ka thup kaba mynta wat la ki paralok MLA jong u kiba la mih lut kum ki kyrtong ka party.
Kat kum ka tyllong khubor kaba la ïohlum la ong ba une u MLA ka TMC u khlem pan tiket satia na ka TMC hynrei u la pynkhreh ban pan tiket noh na ka UDP.
Shuh shuh la ong ba kane ka jingbym pan tiket jong u na ka TMC hynrei un pan pynban na ka UDP ka dei namar u sngewthuh ba lada un ïakhun na ka TMC un ym lah shuh ban jop biang na kane ka constituency kaba u la jop ha u 2018.