Shillong, K’lyngkot 06 : Ka samla Pynsngew tynnad Rynjah na ka shnong Syniasya bad ka Kong Shembhalin Mynsong na Jongksha ki la jop ïa ka nam Miss bad Mrs Mawkynrew 2023 ba la pynïaid da ka Dorbar Shnong Laitlum ba la pynlong ha Laitlum Grand Canyon hynne ka sngi Thohdieng.
Ïa ka kyrdan ba nyngkong (1st Runners Up) ha ka jingïakob Miss Mawkynrew la jop da ka samla Dabisharbha Mylliemngap bad ïa ka kyrdan ba ar (2nd Runners Up) la jop da ka samla Deibyntalang Mylliemngap, baroh arngut kidei na ka shnong Laitkyrhong.
Katba ïa ka kyrdan ba nyngkong ha ka jingïakob Mrs Mawkynew la jop da ka Kong Fatima Mynsong (Jongksha) bad ïa ka nam ba ar (2nd Runers Up) la jop da ka Kong Idarijinghun Mylliemngap na ka shnong Laitkyrhong.
Ïa katei ka jingpynïakob thei bhabriew ka Dorbar Shnong Laitlum ka la ïoh ban pynlong da ka jingkyrshan ba radbah jong u Bah Banteidor Lyngdoh uba dei u MLA ka Mawkynrew Constituency ha kajuh ka por u Myntri Sorkar jong ka tnad Sports and Youth Affairs jong ka Sorkar Jylla.
Watla ka dang dei tang ka sien ba nyngkong ba la pynlong ïa kaba kum katei ka jingpynïakob thei bhabriew ha katei ka thaiñ Mawkynrew, pynban ka la long kaba shongkun bad shongshit bha na ka jingwan ban ïashim bynta shitrhem ki longkmie kiba la pynshohbiej ïa ki paidbah nongpeitkai kiba la poi da ki hajar ngut lyngba da ki riam tynrai bad ka rukom ïaid halor rynsan kaba itynnad bha.
Kumjuh ruh ka jingïashim bynta ki samla jong ka dong ka thaiñ Mawkynrew, kiba ym ïapher shuh ka jingtbithaba ïanujor bad ka jingpynlong jingïakob thei bhabriew ha ki rynsan kiba heh bapoh ka Jylla, ka la pynkyndeh mynsiem ïa ki paidbah naduh ki longkmie ki longkpa, ki samla kynthei bad shynrang haduh ki hep kiba rit hashwa ban pynbna ïa ki nongjop.
Ym lah ban leh ba da ka jingpynlong jong ka Dorbar Shnong Laitlum ryngkat ka jingkyrshan u MLA ka thaiñ, ka la sei shisha ïa ka sap jong ki samla bad ki longkmie ha kaba kum kane ka jait jingïakob. Kane ka long ka nuksa ïa kiwei pat ki shnong khamtam ha ki thaiñ nongkyndong ba kin pynlong ïa kaba kum kane ka jingpynïakob thei bhabriew khnang ba ki samla bad ki longkmie kin ïoh ban sei ïa ki sap ba ki don.
U Bah Banteidor Lyngdoh haba kren kum u kongsan, u la ai khublei ïa ka Dorbar Shnong Laitlum kaba la shim nyngkong ïa kane ka sienjam bad kumjuh ruh ïa baroh kiba la don bynta ban pynbit pynbiang ïa katei ka prokram kaba jop. U la ong ba ki samla jong ka thaiñ Mawkynrew mynta ki la sdang ban kiew shaphrang ha ki liang baroh da kaba ai nuksa ba da ka jingpynlong ïa ka Mawkynew Cup ki la mih shibun ki samla ïalehkai ym tang ki shynrang hynrei wat ki kynthei ruh.
Shuh shuh u la ong ba da ka jingpynlong ïa katei ka jingpynïakob thei bhabriew kan sei ïa ki sap jong ki samla bad ki longkmie da kaba kyrmen skhem ba kim kut tang ha ka thaiñ Mawkynew hynrei kin sa ïoh ruh ban mihkhmat sha ki rynsan kiba heh ha nongbah Shillong.
U la kular ruh ba na ka liang jong u, un ïai don ryngkat ban kyrshan ïa ki samla bad ban pynlong ïa kane ka jingpynïakob thei bhabriew manla u snem.
Ha kane ka sngi la ïadonlang ruh u Sordar Shnong Laitlum u Bah Philip Mylliem, Secretary Shnong Bah Shemphang Nongspung, Kong Amanda Pakynteiñ, ki riew rangbah jong ka dong ka thaiñ. Bad ïa katei ka jingpynïakob thei bhabriew la wan ban bishar da ka Kong Marjorie Noreen Dunai kaba dei ka Mrs Shillong 2019, ka samla Naphila Warbah kaba dei ka Miss Hynñiewtrep 2017 bad u samla Rapborlang L. Mawphlang uba dei u fashion designer.
