Ka BJP ka don ïa ka jingmut ba jakhlia, ki paidbah kin sa ai jubab, ong u Mukul Sangma

By Mawphor News Desk On Jan 7, 2023

Shillong, K’lyngkot, 05: U Nongïalam jong Liang Pyrshah u Mukul Sangma uba long ruh u Myntri Rangbah barim jong ka jylla u la takraiñ tyngeh ïa ka Bharatiya Janata Party (BJP) da kaba ong ba ka don ka jingmut ba jakhlia bad kyntu ruh ïa ki paidbah ba kin sa ai da ka jubab ha ka elekshon sha ka Iingdorbar Thawaiñ ka ban sa long mynta u snem 2023 ha ka Jylla.
U Sangma u la kynthoh ïa kane halor ka jingkam jong ki nongïalam ka BJP ba kano kano ka seng saiñpyrthei kan ym lah satia ban thaw ïa ka Sorkar khlem ka jingïatreilang bad ka BJP ha u snem 2023.
“Hato ki mut ban ong aiu? Hato ki pyrshang ban shu thied ïa ki MLA? Hato ki pyrshang ban ïakyrsum ha ka jyrsieh bamsap? Kane ka pynpaw ïa ka jingthmu ba jakhlia jong ki bad ka jingmut ba jakhlia jong ki. Nga ngeit ba ki paidbah jong ka jylla kin sa ai da ka jubab kaba biang,” ong u Sangma ha ka jingïakren bad ki lad pathai khubor ha ka sngi Thohdieng.
U la ong ba ka shong ha ka jingstad jong ki paidbah ka jylla ban pynjah kyrteng ïa ka BJP kumba ka long ha u snem 2010 bad ha u snem 2013.
“Ki la pyrshang ban shu thom da ka bor wat ïa ka iktiar jong u paidbah, kaba long u païa jong ka synshar paidbah. Ka long kum ka jingñiewbeiñ ïa ki nongthep vote bad nga da pynrem jur ïa kane,” la bynrap u Sangma
Haba kylli, u Sangma u la ong, “dei na kane ka daw phin ïohi ba ka Sorkar ka long kum ka sorkar ba shah khyrwait shabi bad ki paidbah ka jylla ki hap ban siew ïa ka dor bad ka jylla baroh kawei ki hap ban siew ïa ka dor bad dei na kane ka daw ki paidbah kim kwah satia ba kine ki wan jia biang sa shisien.”
Ha u snem baladep, u State President ka BJP u Bah Ernest Mawrie u la kam ba ka khubor ka long kaba shai ba yn ym lah satia ban thaw ïa ka Sorkar khlem ka jingkyrshan jong ka BJP ha u snem 2023.
Kane ka jingkam jong u Bah Mawrie ka long hadien ba ki seng saiñpyrthei bapher bapher dang shen ki la kam ba kin ïoh ïa ka jingjop ba bun paid ha ka elekshon sha ka Iingdorbar Thawaiñ ka ban sa long ha kane ka jylla bad ong ba kine ki seng saiñpyrthei kin tei ïa ka ing paki dulan ha suiñ.