Thylli war ka pla tyngka ka tnad Social Welfare shem jingeh ban pynïaid ïa ki Children’s Home

Shillong, Nailar 30 : Ka Tnad Social Welfare ka Jylla ka la mad ïa ka jingeh kaba khraw namar ka pla tyngka jongka ka la thylli hi war ban pynïaid ïa ki State Children’s Home jong ki Kynthei bad Shynrang ha ka Jylla.
Kat kum ka khubor ba ïoh lum, kane ka jingthylli ka pla pisa ka la sdang naduh u bnai Jymmang 2023 bad ka la bteng kat haduh mynta mynne.
La ïathuh ba ki Superintendent jong kine ki Childrens Home ki la pynïaid ïa kine ki jaka ri ïa ki Khynnah da kaba sei pisa na la ka jong ka pla bad lyngba ki katto katne ki synniang.
Lah ban kdew hangne ba haduh 90% ka pisa ka la leit sha ka MWCD ka wan na ka Sorkar Pdeng bad 10% ka wan na ka pla tyngka ka Sorkar Jylla.
Haba ïakren bad u nongai khubor, u Superintendent of Childrens Home (Boys) ba don ha Tura ula ong “Ngi don 8 ngut ki khynnah shynrang hangne bad ngi hap ban aibam ïa ki, phah ïa ki sha skul. ïa mynta ngi la pynbiang ïa kine ki khynnah lyngba ki jingnoh synniang bad ki jingïarap”.
Une u Ophisar ula ong ba ka jingtyrkhong pisa ka dei kaba pynkhuslai bha namar ngi hap ban pynbiang ïa ki jingdonkam ki khynnah, ki nongtrei, ka tulop bad kumjuh ruh ban pynïaid ïa ki kam ka Ophis.
Ula bynrap “Kam dei satia tang kane ka Childrens Home jong ngi, kiwei ki Childrens Home jong ki Kynthei ruh ki mad ïa kajuh ka jingeh. Ym tang hangne hynrei kiwei ki District ruh ki mad ïa kajuh ka jingeh”.