Nongpoh, Nailar 30: Ban pyrshah jur halor ka jingpyni bor ka Company Topcem ha East Jaintia Hills da ka jingshim kabu ki bar jylla ban phah bom phah shoh ïa ki Khasi kiba pyrshah ïa katei ka Company kumba la jia ha ka 24 tarik u Nailar 2023, ka Seng Hynñiewtrep Youth Council, (HYC), Ri Bhoi District kum ka jingpyrshah ïa katei ka Company mynta ka sngi ka mih ban leit tah syndon da ka jingthoh (Notice) sha bun tylli ki dukan die cement ba kyrpad ba kim dei shuh ban die ïa u Cement Topcem.
Ki nongïalam ka HYC Ri Bhoi ha ka jingïalam u President, u Bah Hercules Suting bad u Secretary, u Bah Tony Shylla ryngkat ki dkhot mynta ka sngi ki la mih ban leit tah da ki kynja jingthoh ban mana ïa ki nongdie cement ha Ri Bhoi khamtam ha Nongpoh ba kim dei shuh ban die ïa u CementTopcem.
Ka seng ka la shim ruh ïa kane ka sienjam ban pyrshah ïa katei ka Topcem Cement, ka dei hadien ba ha ka 24 tarik u Nailar 2023 ba bun ki Longkmie bad ki riew paidbah ki la shah bom shah shoh ha ki bor pulit, kaba dei halor ka jingpynshit ki bar jylla na ka daw ba ki paidbah ki pyrshah ïa ka jingthmu ka Company Topcem ban pynïar ïa ka jingtreikam ba ki paidbah ki la pyrshah ïa ka Public Hearing ba la pynlong ha katei ka sngi.
Na ka liang ki nongïalam ka HYC Ri Bhoi mynta ka sngi ki la leit syndon ban tah da ki kynja jingthoh (Notice) sha bun tylli ki dukan die cement ha Ri Bhoi bad kaba ki la kyrpad ïa ki nongdie cement (Dealer) ba kim dei ban die ïa utei u cement ba pynïaid da katei ka Company katba kim pat lah ban pynbeit ïa kitei ki kynrum ki kynram kiba mih ha East Jaintia Hills ba ki paidbah ki pyrshah ïa ka company Topcem.
U President ka HYC Ri Bhoi, u Bah Hercules Suting, haba kren sha ki lad pathai khubor, u la ong ba ka seng ka sngewkhia jur halor katei ka jingjia ha East Jaintia Hills ba ki bor pulit ki la bom la shoh ïa ki paidbah tang na ka daw ka jingpynshit ki bar jylla kiba pynïaid ïa katei ka Company Topcem bad ka seng ka pynrem jur halor ka jingleh donbor ki Pulit kiba la bom la shoh ïa ki paidbah tang na ka daw ba ki pyrshah ïa katei ka Public Hearing.
U la ong ruh ba ka seng kam hun satia tang ba katei ka Company ka la weng kam ne pynkynriah kam ïa kito ki bar jylla kiba pynshit ha katei ka sngi ba ki bor pulit ki la shu bom naphang ïa ki paidbah, hynrei ka seng HYC na Ri Bhoi ruh ka dawa na ka sorkar ba ka dei ban kem ruh ïa kito ki bar jylla kiba pynshit ïa ki bor pulit ban bom ban shoh ïa ki paidbah tang na ka daw ba ki pyrshah ïa katei ka Public Hearing.
Shuh shuh, u la ïathuh ruh ba mynta ka sngi ka seng ka la leit ban tah ïa ki notice ha kylleng ki jaka ha Ri Bhoi na ka bynta ban kyrpad naki Nongdie Cement ba kin ïa snohkti lang bad ka seng ban pyrshah halor ka jingshah bom shah shoh ki Longkmie ha ki bor pulit bad halor ka jingleh jong ka Company Topcem dei ban pynsangeh shipor ban die ïa u Cement Topcem kum ka jingpyrshah halor ka jingleh donbor katei ka Company, u la bynrap.
