Nongpoh, Nailar 30: Ka kynhun jong ka All Ri Bhoi District Government Registered Contractor & Suppliers Association (ARBDGRCSA) mynta ka sngi hadien ka jingïalang kaba la long ha Umsning ka la pynmih da kawei ka jingdawa na ka sorkar jylla ba kino kino ki kam ba pyntrei ha Ri Bhoi dei ban ailad shuwa ïa ki Contractor kiba dei na Ri Bhoi District.
Kane ka seng jong ki Contractor bad ki Supplier ki la pynpaw ruh ïa kane ka bynta halor ki kam ki jam ba dei ban trei da ki Contractor bad ki supplier, ka dei halor ka nongrim ba bun na ki Contractor bad ki supplier na Ri Bhoi kim ju ioh kam thikna bad bun ïa ki kam la leh da ki Contractor bad ki supplier kiba ba na shabar ka District.
Haba ïa kren bad ki Nonghtoh Khubor, u President ka ARBDGRC&SA, u Bah F.M Mawphniang u la ong ba kane ka jingdawa kane ka seng halor ki kam ki jam ha Ri Bhoi ba dei ban ai shuwa ïa ki Contractor bad ki Supplier na Ri Bhoi, ka dei hadien ba bun na ki Contractor bad ki Supplier na Ri Bhoi ki la pynpaw ïa ki jingeh kiba ïa dei bad ka jingbym ioh kam ioh jam, namar bun ki kam ki jam kiba pyntrei ha Ri Bhoi la trei da ki Contractor kiba na shabar ka District.
U la ong ruh lyngba kane ka jingïakynduh lang mynta ka sngi ha Umsning, la ïa kren halor shibun ki mat kiba ïa dei halor ka jingeh ki Contractor bad ki Supplier bad ki mat ba kham kongsan ka dei ka jingdawa na ka sorkar jylla ba haba pynmih ïa kino kino ki kam la dei ban ailad shuwa ïa ki Contractor bad ki Supplier kiba na Ri Bhoi khnang ban lah ban weng ïa kine ki jingeh jong ki Contractor bad ki Supplier na Ri Bhoi kiba ju kynduh jingeh ha ka liang ka jingkyrduh kam kyrduh jam.
U la ong ruh ha kane ka jingïakynduh lang la rai ruh ban dawa na ka sorkar jylla ba ka dei ban buh noh ïa ka ophis treikam ba pura jong u Superintending Engineer ka tnad PWD hapoh Nongpoh, namar kane ka ophis treikam sorkar ba pura kam pat don ha Ri Bhoi bad da ka jingdon kane ka ophis treikam kan ai jingmyntoi shibun ïa ki paidbah ka dong Ri Bhoi.
Na ka liang kane ka seng ka la shim ruh ka rai ban dawa na ka sorkar ba dei ban pyntrei noh ïa ka jingkieng Flyover ha Khanapara, namar mynta la 50 snem ba la ïaid lynti ka jylla ka sorkar kam pat lah ban shna kum ki jingkieng ban ïaid ki kali paidbah bad ki paidbah khnang ban pynsuk ïa ki paidbah ha ka leit ka wan kiba la shah ktah na ka por sha ka por na ka jingdheng ki Kali paidbah,u la ong.
Une u nongïalam u la ïathuh ruh ba ki la ïa kren kyrpang ruh halor ka Asian Development Bank (ADB) kaba la mang da ki hajar klur tyngka ha ki katto katne ki tnad treikam ka jylla Meghalaya bad kum ka seng ka sngewkhia pat ba ïa kine ki kam ba la mang da ka ADB la hap ban pyntrei pynban da ki Kompani kiba na shabar ka jylla Meghalaya.
U la ong ruh ba kane ka seng ka dawa ruh na ka sorkar jylla ba kan phiah ïa ki jingpynmang ïa kine ki jingtrei kiba la kot da ki hajar klur tyngka bad ban ailad ruh ïa ki Kontraktor jong ka jylla hi ban pyntreikam kum ka lad aikam aijam bad ruh ban pynsuk ïa kine ki tnad sorkar jylla ban pyndep ïa kita ki kam ba la mang da ka sorkar.
Namar kata, na na ka liang kane ka seng lyngba kane ka jingïalang kaba la long mynta ka sngi ka la la jied ruh ïa u Bah RM Mukhim ban long kum u Adviser jong kane ka seng na ka bynta ban ai jingmut kumno ban pyntyllun ïa ki kam jong ka seng na ka bynta ka jingmyntoi jong ki Kontraktor kane ka District bad ruh na ka liang ka synjuk ka don ruh ïa ka jingangnud ba ka sorkar jylla kan phaikhmat ban pynurlong ïa ki jingdawa ba la buh da ka kynhun ki Kontraktor ka Ri Bhoi District, u la bynrap.
