Shillong, Nailar 30 : Ka Trinamool Congress (TMC) ka la phaikhmat sha u MLA barim ka Umroi u Bah George B Lyngdoh ban long kum u kyrtong ka party ban ïakhun ha ka elekshon MP-Lok Sabha na Shillong Parliamentary seat ka ban long ha u snem ban wan.
ïa kane la pynpaw da u President ka Meghalaya Trinamool Congress Bah Charles Pyngrope haba ïakren bad ki lad pathai khubor hynne ka sngi Balang ha Shillong.
“Ha nga shimet hi, nga sngew u Bah George B Lyngdoh u dei u kyrtong uba biang eh hynrei ka party kan sa shong bishar bniah halor ki kam ba ïadei bad ka elekshon MP-Lok Sabha 2024” ong u Bah Charles.
Une u MLA ka TMC na Nongthymmai ula pyntip ba haduh mynta, ka Party kam pat shim satia ïa kano kano ka rai halor ka kam elekshon MP-Lok Sabha hynrei kum ka party kan sei kyrtong na baroh artylli ki parliamentary seat-ka Shillong bad Tura parliamentary seat.
“Nga la dep ban ïakren bad u General Secretary ka TMC ba khmih ïa ka Meghalaya u Manas Bhunia bad nga la pan por ban ïakynduh ban ïakren kham bha la kan long ha Shillong ne ngan leit nga sha Kolkata” ula pyntip.
Haba kylli, ula ong ba ïa ka Shillong parliamentary seat hi, u kwah ban pynïakhun ïa u Bah George B Lyngdoh hynrei ïa ka Tura parliamentary seat, u ïeh ha ka jingstad u nongïalam ka TMC parliamentary party Dr Mukul Sangma ban leh ïa kaba donkam.
