Thurmur ka rukom pynrung kyrteng pule doktor ka sorkar ha ka Open Category

Shillong, Nailur 2 : Kat kum ba ka paw shai kdar na ka list ba la pynmih da ka tnad ka koit ka khiah jongka sorkar jylla ïa ki samla pule ban leit pule doktor ha ka Open Category la ïohi shai kdar ba ka don ka jingleh thurmur bad leh buitpoh da mano re mano namar ki samla pule kiba la wan shakhmat duh ha ka Khasi bad Jaintia Category kiba dei ban rung ha ka Open Category kim shym la ïoh rung katba uba wan ha ka kyrdan ba lai ha ka Khasi bad Jaintia Category pat u la ïoh ban rung ha ka kyrdan Open Category.
Ha ka jingshisha ki arngut ki samla pule ba la shah jied ban pule doktor ha ka Khasi bad Jaintia Category kiba wan ba nyngkong bad ba ar ki la dei ban rung ha ka kyrdan ba 7 bad ba 8 jongka Open Category namar ki dang heh marks ma ki ban ïa kiba rung mynta.
Kat kum ka list ba la paw ha ka Open Category ha ka kyrdan ba 7 la wan da u Chiranjit Kumar Paul uba ïoh 562 marks ha ka NEET UG 2023, 83 % ha ka PCB bad 82.5 % ha ka PCBE. Ha ka jingshisha ha ka jaka jong une la dei ban rung da I Aidamon Khongsngi iba wan ba nyngkong ha ka Khasi bad Jaintia Category bad ïoh 567 marks ha ka NEET UG 2023, 93.66 % ha ka PCB bad 92 % ha ka PCBE. Haka jaka jong ka Deeya Chaudhary kaba wan ha ka kyrdan ba phra ha ka Open Category kaba ïoh tang 559 marks ha ka NEET UG 2023,94 % ha ka PCB bad 93.25 ha ka PCBE la dei ban rung da u samla Dalangkiso Myrtong uba wan ba ar ha ka Khasi bad Jaintia Category uba ïoh 565 marks ha ka NEET UG 2023, 94.66 % ha ka PCB bad 91.5 % ha ka PCBE.
Kine ki arngut ki dei kiba wan ha ka kyrdan ba Nyngkong bad ba Ar ha ka Khasi Jaintia Category katba uba rung pynban ha ka Open Category u dei u Stephen Marbaniang uba ïoh 550 marks ha ka NEET UG 2023, 90 %,91.5 ha ka PCBE. Une u dei ban rung ha ka kyrdan ba lai ha ka Khasi bad Jaintia Category. Kane keiñ kaba pyni ïa ka jingleh thurmur ha kaba jied bad pynrung ïa ki kyrteng, namar kiba dei hok ban rung ha ka Open Category kim ïoh rung hynrei ki bym ïa ryngkat kyrdan ki ïoh ban rung.
Nalor kata lah ban pynkynmaw haba ka sorkar ka la pynmih ïa ka List kaba nyngkong na kito kiba shah jied, na ka liang ka KSU ka la ai ka jingujor pyrshah namar ka la lap ba ki don kiba la shah jied ha ka Open Category kim dei satia ki trai jylla hynrei ki dei kiba na Assam. Halor kane na ka liang ka sorkar ka la pynpaw ba kan bishar bniah ïa ki kot ki sla hynrei ïa kane ruh khlem da pynshai paidbah kumno ka sorkar ka lap ïa kita ki kot ki sla la ki dei shisha ki trai jylla ne ki dei kiba na Assam kumba la lap da ka KSU hynrei la pynmih noh ïa ka list kaba ar.
Ban da dei ba I samla Aidamon Kongsngi bad u Dalngkiso Myrthong ki rung ha ka Open Category khlem pep sa arngut ki samla pule doktor na ka list Khasi bad Jaintia Category kiba don ha ka Waiting List ki la ïoh ban rung pat ha ka list jong ka Khasi bad Jaintia Category bad ïoh ban leit pule doktor hynrei kane ka jingleh jongka sorkar la ka pynduh nong ia ki samla Khasi bad Jaintia namar ym lah ban len napdeng ki samla pule na ri lum Garo la bishar bniah bad lap ba kin ym ïoh lad hi ban rung ha ka Open Category namar ki kham duna ki marks bad Percentage jongki.
La ïoh jingtip ba ka KSU kaba la bud dien ïa kane ka kam naduh kaba sdang kan ym shong kli kti hynrei kan ïai bud dien tad haduh ban da ïoh pynrung ïa ki samla Khasi bad Jaintia kiba wan shakhmat ha ka Open Category khnang ba kiba don ha ka Waiting List pat ruh kin ïoh ban rung ha ka list ban leit pule doktor.