Thrang ka Sorkar ban kyntiew ïa ka Literacy Rate sha ka 100 % ha Meghalaya

Shillong, Nailur 08 : Ka Sorkar Jylla ka thrang bad ka la rai ban buh ïa ka thong ban pyrshang katba lah ha ka ban kynjoh ïa ka 100 % ka jingdon ki nongshong shnong kiba nang ban thoh ban pule (literacy rate).
Ka Ministry of Education (MoE) dang shen kala thoh sha baroh ki Jylla, ba kyntu ïa ki ban batai shaphang ka literacy (ka thoh ka pule) bad full literacy ( ka thoh ka pule ba pura).
Halor kane, u Myntri ka Tnad Pule Puthi u Rakkam A Sangma ula pyntip ba um pat ïohi satia ïa kane ka shithi hynrei u kubur ba ka shithi ka lah ban don hapoh ka Tnad.
Ula ong “Ha Jylla jong ngi, ngi don halor jong ka national average haba phai sha ka thoh ka pule, hynrei kam pat da biang satia. Ka Jylla jong ngi kala dei ban kynjoh ia ka 100 % ka pule ka thoh ïa mynta. Ngin hap ban trei shitom ban kynjoh ïa ka thong”.
U Myntri ula kubur ba ki don katto katne ki District kiba la leh bha ban ïa kiwei haba pynpaw ïa ka jingbym nang batai balei ba ka Ri-lum Jaintia ka dei kaba duna eh ha ka jingdon ki nongshong shnong ba nang ban thoh ban pule.
“Ngam lah ban tip ïa ka daw tynrai, hynrei ngin sa wad ïa ka. La ka dei ka kam ba shisha ne dei ka jingbakla lum jingkheiñ. Ngin sa khot ïa ka jingïalang bishar kam ban pynthikna ïa ka daw bad ban shim ïa ka sienjam ha kaban leh eiei halor jong ka. Kane ka dei ka kular jong nga. Nga kyntu ïa baroh ban ïatreilang ha ka ban pynlong ïa ka Meghalaya kaba don 100% ki nongshong shnong ba nang ban thoh bad pule”.
Haba kylli, u Rakkam ula ong “Ngin sa bishar ïa ka literacy rate jong kawei pa kawei ka District. Ngin donkam ban sngewthuh ïaki jingeh jong ki, kaba lah ban ïapher na kawei ka District sha kawei pat bad ban wad ïa ka lynti ban weng ïa ki”.
Haba ïanujor bad ki Jylla kum ka Kerela bad Mizoram, u Rakkam ula kubur “Ngam tip thikna balei ka jia kumne. Nga dang long Myntri dang shisnem hynrei ka dei ka kam kaba nga sngewkhia bha. Ka Mizoram ka kham pher na ka Meghalaya ha ka liang ki lad pynïasoh, ki rukom treikam bad kiwei kiwei-ngi dei ki Jylla riewlum hynrei ka Meghalaya ka don shadien hynrei ngi lah ban shim da ki lynti ha ka dur jong ka mishon bad trei sted ban beh shakhmat”.
Haba pyntip ba kumba 24-25 % na ki nongshong shnong ka Jylla ki dei ki bym nang ban thoh ne pule, u Rakkam ula ong “Hooid, kat kum ki jingthoh, ka long kaba kyndit. Hynrei, ngam da tip thikna haduh katno ki dei ki jingkheiñ. Ngi donkam ban wad la ki jingkheiñ ki dei ki jingshisha ne em. Ka daw ka lah ban dei namar ka jingduk, ka jingjngai jong ki skul lane kiwei kiwei ki jingeh hynrei ngi hap ban tohkit bad ngan sa khot noh shen ïa ka jingïalang bishar bniah ïa ka kam”.