Shillong, Nailur 08: Kan long kaei kaei kaba sngewkhia ha kaba bun na ki paidbah ka nongbah Shillong bad kumjuh ruh na kiwei ki shnong kiba ju wan ban siew ban tda hapoh ïewduh ba kin lap ba ka jingkiew dor ki mar ki mata ha kane ka kynti ka la long shaba palat.
Ha ka jingleit jurip jong u nongthoh khubor la lap ba bun na ki longkmie kiba leit siew na ka bynta ki ïing ki sem ki la pynpaw ïa ka jingsngew kyndit ban tip ba ha kine ki khyndiat sngi ka dor jong u pyiat ka la kiew dor sha ka T.70/- tyngka shi kilo bad kane ka la pynkyndit ïa kiba bun balang bad ym tang katta hynrei ka la ktah ruh ïa ki longïing kiba tlot ha ka ïoh ka kot.
Haba ïoh ban ïakren bad ki nongdie ki la ïathuh ba ka don ka jingduna ka jingwan poi jong u Pyiat bad la ong ba kane ka ju jia man ka por shuwa ban poi u Pyiat ba thymmai, naba u Pyiat ba rim u la jan lut bad dei na kane ka daw ba sa kiew dor.
Lah ban ong ba kiba leit ïew leit hat ban siew ban tda ki la ong ba kane ka jingkiew dor jong u Pyiat na ka T.50/- tyngka sha ka T.70/- tyngka ka long kaba la katto katne sngi bad ka jingkiew syndet ka long T.20/- tyngka shi kilo, kane ka la ktah shisha ïa ki paidbah.
Lah ruh ban ong ba u Pyiat u dei u jait marbam ba baroh ki briew ki pyndonkam ha ka shet ka tiew, naduh kiba rewspah tam haduh kiba duk ruh kum juh bad kane ka jingkiew dor ka la buh shisha ïa ki paidbah ha ka jingeh kaba khraw, namar ïa u Pyiat la pyndonkam da baroh ki paidbah.
Kawei ruh na kidaw jong ka jingkiew ki marbam ha kane ka jylla ka lah ban dei na ka jingwan poi jong ki marbam na kiwei pat ki jylla bad kumjuh ruh ka jingwan kit ïa ki da ki trok kaba hap ban shim por da kiba bun ki sngi, bad sa kawei, kaei kaba jia ha lynti syngkien ka la wanrah ka jingeh ïa ki paidbah kiba bun balang khamtam ha kane ka jylla.
