Khlem lah pyndep ïa ki 2 tylli ki SWMP ha Nongpoh bad Tura leh nohei ka pisa da ki klur tynga

Shillong, Nailur 08: Artylli ki solid waste management project (SWMP) ha Nongpoh kaba ha Ri Bhoi district bad Tura ha West Garo Hills District ki la mad ïa ka jingeh jong ka jingpynslem bad ki neh khlem da la lah ban pyndep, ha kaba ki composting facility bad kiwei ki jingtei la shu ieh khlem da pyndonkam wat hapdeng ka jingsiew na ka bynta ki kam paidbah ha kaba kane ka la lam sha ka sha ka jingpynlut kai ïa ka pisa kaba T. 4.48 klur bad ka T. 5.16 klur.
Ïa kane la pynpaw da Comptroller and Auditor General of India (CAG) ha ka kaiphod kaba ïadei bad ka solid waste management ha ki jaka sor jong ka Meghalaya haba kut jong ka 31 tarik Lber, 2022.
La ong ba ïa ka SWM project na ka bynta ka Nongpoh town la mang ha u bnai Lber 2009 ha ka dor kumba T. 600.16 lak bad na ka bynta ka Tura town ha ka dor kumba T. 833.10 kaba hapoh ka UIDSSMT jong ka JNNURM.
Ïa kane ka kam la ai sha ka M/s Marbaniang Enterprises.
Ka kaiphod ka ïathuh ruh ba baroh ka jinglut ba la buh na ka bynta ki civil work katkum ka final running account (FRA) bill na ka bynta ki civil work ka la long T. 3.43 klur katba ka jinglut kaba la buh na ka bynta ka compost plant ka long T. 0.82 klur.
Ka Joint physical verification (JPV) jong ki SWM ha Nongpoh kaba ha ka 17 tarik u Naiwieng, 2022, ka la pynpaw ba ïa kane ym pat aiti sha ka town committee da ka MUDA.
La pynpaw ruh ba ïa ki tiar ki tar bad ki kam ha Nongpoh ym pat lah ban sdang bad ka kam thung jingthung ym lah ban leh khlem ki tiar ki tar.
Ha ka jubab ka kaiphod ha u Kyllalyngkot 2023, u secretary, MUDA la ong ba ka jingslem ban aiti ïa ki kam ka dei na ka daw ka jingdon jong ka khlam COVID 19.
Shuh shuh la ïathuh ba ka jinglum ïa ki ñuit kumba ka long mynta ha Nongpoh ka kynthup kyrpang ïa ka biodegradable bad ka recyclable waste. Wat hapdeng ka jingbym don ka jaka theh ñuit ka jingtreikam haba lum ïa ki ñuit kan ym ktah ïa ka solid waste management ha Nongpoh.
Ka kaiphod ka la ong ba ka final bill na ka bynta ban tei ïa ki kam compost plant la dep ban siew ha u Lber 2017, kaba la long 3 snem shwa ban wan ka Khlam.
“Shuh shuh katkum ka detailed project report (DPR), kumba 52% na ka ñuit ba ka lum ha Nongpoh town area ka dei bio-degradable,” ong CAG.
Ka jinglut baroh na ka bynta ka civil work kaba long katkum ka final running account (FRA) bills ka long T. 3.98 klur.