Nongstoiñ, Rymphang, 02: U bah Gigur Myrthong kyrtong jong ka seng National People Party (NPP) na Mawshynrut konsti-twensi, mynta ka sngi palei u la leit ban thep kyrteng hakhmat u Returning Officer ka Mawshynrut u Bah H.K Thabah, MCS. U la long ruh u kyrtong ba nyngkong eh na ki Constituency ka West Khasi Hills ban leit thep kyrteng.
Ïa utei u kyrtong la synran lang da ki ba haïing hasem, ki paralok para jor bad ki nongïalam ba hakhmat ka seng NPP Mawshynrut, ha ryngkat ki spah ngut ki nongkyrshan, kiba la ïa risa kynhoi ruh, ‘Ha ka kot ha ka kot’, mar ïa mih na khyrdop jong ka ophis u Deputy Commissioner West Khasi Hills.
Haba kren sha ki lad pathai khubor hadien ba la leit thep kyrteng, u Bah Gigur Myrthong u la ong ba ka thong ba hakhmat eh jong u lada u ïoh ïa ka jingjop ha kane ka elekshon, ka long ban kyntiew ïa ka pule puthi bad ban pynbha ïa ki surok bad lynti syngkieng ha ka dong ka thaiñ baroh kawei.
Haba kylli ïa ka jingsngew jong u, la hato u skhem ne em ban ïoh biang ïa ka jingjop ha kane ka elekshon, na ka liang u Bah Gigur u la ong, “Ki paidbah hi ki la sakhi ïa kaei kaba u la leh ha kine ki san snem jong ka jinglong MLA jong u. Kumta u kyrmen skhem ba kin ai biang ka jingjop ïa u ha kane ka kynti”.
